नेपाल कम्युनिष्ट पार्टी (क्रान्तिकारी)का वरिष्ठ नेता सिपी गजुरेलले प्रधानमन्त्री केपी शर्मा ओली स्वेच्छाचारी भएको भन्दै उनलाई गलाउन जनताबाहेक अरु केही विकल्प नभएको टिप्पणी गरेका छन् । उनले माधव नेपाल, प्रचण्ड वा अरु कुनै नेताको दबाबले केपी ओली नहल्लिने दाबीसमेत गरे । तर, सडक आन्दोलनले भने ओलीलाई पदच्युतसमेत गरिदिन सक्ने चेतावनी गजुरेलले दिए ।
बुधबार काठमाडौँमा आयोजित साक्षात्कारमा उनले भने, ‘प्रचण्डको अहिले प्रधानमन्त्री हुने कुनै सम्भावना छैन । प्रचण्डमात्रै होईन, ओलीको विकल्प अहिले माधव नेपाल पनि होइनन् । संविधानतः ओलीको अहिले विकल्प छैन् । सडक आन्दोलनबाट चाहीँ हटाउन विकल्पै विकल्प छन् ।’

उनले ओली नेतृत्वको सरकार असफल हुँदै गएको दाबीसमेत गरे । ‘सरकारले जनताको आँखामा छारो हाल्ने कामभन्दा अरु केही पनि गर्न सकेको छैन । यो सरकारलाई सफल सरकार भन्ने ठाउँ कतैपनि छैन्,’ उनले भने ।

नेता गजुरेलले साँढे ३३ केजी सुन प्रकरणको बारेमा सरकारले केही समय निकै हल्ला गरे पनि अहिले त्यो सुन नै गायब भएको आरोप लगाए । यस्तै निर्मला पन्तको हत्यारा पत्ता लगाउन नसक्नुले पनि सरकारलाई निरीह तुल्याएको उनको भनाइ छ ।

गजुरेलले डा. गोविन्द केसीबारे पनि बोले । चिकित्सा क्षेत्रको सुधारका लागि २७ दिनसम्म अनशन बसेर डा. केसीले सरकारसँग सम्झौता गरे पनि सरकारले सदनमा त्यससम्बन्धी कुनै काम नगरेको उनको आरोप लगाए ।

सत्तामा नभएका वामपन्थीहरुसँग आफ्नो पार्टीले एकताको लागि वार्ता तथा छलफल गरिरहेको उनले बताए ।