नेपाल राष्ट्र बैंकका कार्यकारी निर्देशक नरबहादुर थापाले हालै लागू भएको सामाजिक सुरक्षा योजनाले वित्तीय क्षेत्रलाई धक्का लागेको बताएका छन् । शुक्रबार काठमाडौंमा आयोजित कार्यक्रममा थापाले हालै सुरु भएको सामाजिक सुरक्षा कोषको उचित व्यवस्थापन हुन नसके त्यसले वित्तीय क्षेत्रमा गम्भीर असर पुर्याउने चेतावनी पनि दिए । ‘यो राष्ट्रको वित्तीय व्यवस्थापनको सबैभन्दा ठूलो कोष बन्दै छ,’ उनले न्युज कारोबारसँग भने, ‘तर चुनौतीको आकार पनि ठूलै छ ।’

अहिले नै सामाजिक सुरक्षा कोष र राष्ट्रिय कल्याणकारी कोषमा ५० अर्ब रुपैयाँ जम्मा छ । थापाले भने, ‘सुरक्षा कोषमा मासिक अर्बौ रुपैयाँ जम्मा हुँदैछ । अब बैंकमा राखेको केही पैसा त्यहाँ जाने भयो । कोषले त्यो ठूलो पैसा पार्किङ गर्नुपर्ने हुन्छ । त्यसका लागि वाणिज्य बैंकमा आउँछ । अब उसले बैंकसँग व्याजको बार्गेनिङ गर्न थाल्छ । यसले त तहल्का पिट्छ । ठूला परियोजनामा रकम खर्च हुन सकेन भने त्यो पैसा मुद्रा बजारमा पोखिन्छ । दिर्घकालीन योजनामा लगाउनुपर्ने पैसा अल्पकालीन मुद्रा बजारमा पोखिँदा त्यसले ठूलो समस्या निम्त्याउन सक्छ ।’

यसबारे सरकारले नेपाल राष्ट्र बैंकसँग छलफल गरेकोबारे आफूलाई केही थाहा नभएको उनले बताए । छलफल र समन्वयकै अभावमा केही कमजोरी हुन गएको उनको आशय छ । भविष्यमा आइपर्न सक्ने जोखिम न्यूनिकरणका लागि सरकारले थप अध्ययन गर्नुपर्नेमा उनले जोड दिए ।