प्रतिपक्षी कांग्रेसको भूमिका
वि.सं.२०७५ पुस २२ आइतवार २३:३७
shares

हालै सम्पन्न कांग्रेस महासमिति बैठकमा पदाधिकारी विवादपछि मुख्य मुद्दाका रुपमा नेतृत्वप्रति उठेको प्रश्न थियो– पार्टी प्रतिपक्षीको रुपमा किन प्रभावकारी बन्न सकेन ? बैठकमा पार्टी सभापति देउवाले प्रतिबद्धता जनाएका थिए– त्यसको सम्बोधन अब हुन्छ ।
मोरङको लेटाङमा शनिबार नेपाल राष्ट्रिय मगर संघले आयोजना गरेको प्रदेश १ स्तरीय प्रशिक्षण कार्यक्रममा देउवाको सरकारविरुद्धको गर्जन र आइतबारको संसद बैठकमा कांग्रेस नेताहरुको आक्रामक प्रस्तुति पार्टीको ‘प्रभावकारी प्रतिपक्षी भूमिका’को ‘सम्बोधन’ हुनसक्छ । यसले वर्षौंपछि भएको महासमिति बैठकले कांग्रेस नेताहरुमा ऊर्जा थपिएको आभाष दिएको छ ।
सरकारले एकपछि अर्को गल्ती गर्दै गए पनि पार्टीभित्रको किचलो र गुट, उपगुटको भुङ्ग्रोमा रापिएको कांग्रेस वास्तवमै निरीह प्रतिपक्षीका रुपमा प्रस्तुत भइरहेको थियो । पार्टीका पहिलो दोस्रो र तेस्रो तहका युवा नेतासम्म आफूविरुद्ध खनिएपछि आहत बनेका सभापति देउवाको भूमिका सर्वत्र प्रतिरक्षात्मकमात्र बन्दै गएको थियो । यस्तो अवस्थामा महासमिति बैठकबाट बटुलेको ‘ऊर्जा’लाई सभापति देउवाले सदन र सडकमार्फत ‘शक्ति’मा बदल्ने कोशिश गरेका छन् ।
मगर संघको कार्यक्रममा देउवाले सरकारलाई शान्तिसुरक्षा, लगानी प्रवर्धन, आर्थिक समृद्धि र भ्रष्टाचार नियन्त्रणमा सरकार असफल भइसकेको आरोप लगाए । मूलतः प्रधानमन्त्रीविरुद्ध आक्रामक रुपमा प्रस्तुत भएका देउवाले ओलीलाई ‘केपी ओली नभएर करप्रसाद ओली’ नामकरण गरे । सरकारले मनपरी कर वृद्धि र असुली गरेको भन्दै देउवाले सरकारले व्यावसायिक वातावरण नै बिगारेको तर्क गरे । वाइडबडीलगायतका अर्बौं भ्रष्टाचारका घटना र कञ्चनपुरमा बालिका निर्मला पन्तको बलात्कारपछिको हत्या प्रकणरण सरकारी असफलताका ज्वलन्त उदाहरण भएको देउवाको दाबी थियो । कांग्रेसका अन्य नेता पनि सरकार र मन्त्रीहरुविरुद्ध योजनाबद्ध ढंगले प्रस्तुत हुन थालेका छन् ।
आर्थिक समृद्धिको बाटोमा मुलुकलाई डोर्याउन नसकिरहेको दुईतिहाइको वामपन्थी सरकार एकपछि अर्को गर्दै अस्वाभाविक लाग्ने गल्तीहरु गरिरहेको छ । टीकापुर हत्याकाण्डका मुख्य अभियुक्त रेशम चौधरीको सपथ यसको पछिल्लो उदाहरण हो । शक्तिशाली सरकार गठन भएको एक वर्ष पुग्न लाग्दा न कालाबजारी र महँगी नियन्त्रणमा आएको छ न त आमनागरिकले शान्तिसुरक्षाको प्रत्याभूत गर्न पाएका छन् । सिन्डिकेट, सुनकाण्ड र निर्मला पन्त प्रकरण हुँदै रेशम चौधरी सपथसम्म आइपुग्दा सरकार तीन बल्ड्याङ खेलिसकेको छ । सरकारका गतिविधिलाई नियन्त्रणमा राख्न नसकेका प्रधानमन्त्री ओली, मन्त्री र कर्मचारीले नटेरेको रोदन गरिरहेका छन् । जुन प्रतिपक्षीका लागि सर्वाधिक बलिया हतियार बन्नेछन् । भलै, आफ्नै उल्झन बाँधिएको कांग्रेस अहिलेसम्म यस्ता विषयमा बलियो ढंगले प्रस्तुत हुन सकिरहेको थिएन ।
तर, आइतबारको संसद बैठकमा कांग्रेसको प्रस्तुतिले ‘प्रतिपक्षी कमजोर छैन’ र ‘सरकारले मनपरी गर्न पाउँदैन’ भन्ने संकेत गरेको छ । संसदीय सर्वोच्चताको खिल्ली उठाउँदै ‘प्रतिवेदन कार्यान्वयनभन्दा प्रभावित पार्ने’ उद्देश्यले वाइडबडीमा सरकारले गठन गरेको ‘उच्चस्तरीय छानबिन आयोग’का कारण पनि कांग्रेस झस्किएको हुनसक्छ । किनकि, आफ्नालाई बचाउन र अन्यलाई सिकार बनाउन यस्ता आयोग उपयोगीसिद्ध हुनसक्छन् ।
संसदमा कांग्रेसको बलियो उपस्थिति र सरकारविरुद्धको आक्रामक प्रस्तुति सञ्चारमाध्यमदेखि सामाजिक सञ्जालसम्मका लागि बलियो खुराक बनेका छन् । सरकारविरुद्ध आमसर्वसाधारणको आशंका बढिरहेका बेला ‘संसदमा कांग्रेसको हंगामा’लाई लिएर अधिकांशले सकारात्मक टिप्पणी गरिरहेका छन् । कांग्रेसको भूमिकाले सरकारलाई करेक्सन गराउन सक्ला नसक्ला, त्यो भविष्यले देखाउँछ तर प्रतिपक्षीको प्रभावकारी भूमिका सरकारको लक्ष्यप्राप्तिमा सहयोगीसिद्ध हुनेमा दुईमत रहन्न ।

























