चितवन । देशकै दुग्ध उत्पादनमा अग्रणी भूमिका खेल्दै आएको चितवनमा अन्तर्राष्ट्रिय डेरी प्रदर्शनी हुने भएको छ ।

चितवन उद्योग संघ र चितवन जिल्ला दुग्ध उत्पादक सहकारी संघको आयोजनामा माघ २५ देखि २९ गतेसम्म प्रदर्शनी गर्न लागिएको हो । नेपालकै इतिहासमा किसान, प्रविधि र अन्तर्राष्ट्रिय बजारमा समेत पहिचान पुर्याउन प्रदर्शनी गर्न लागेको संघका अध्यक्ष किशोर बगालेले जानकारी दिए ।

डेरी उद्योगमा प्रविधि, अर्थतन्त्रमा समृद्धि भन्ने नाराका साथ आयोजना गर्न लागिएको प्रदर्शनीमा दुग्ध उत्पादन र उद्यमशीलता प्रवर्द्धनका लागि स्टल राखिने उनले जानकारी दिए । जसमा डेरी उत्पादक, उद्योगी बन्न इच्छुक नीति निर्माता, सरकारी निकायका व्यक्तिलगायत एकै स्थानमा छलफलका लागि सहभागी हुने उनले जानकारी दिए ।

प्रदर्शनीमा विभिन्न व्यवसायीक प्रवर्द्धनसँग सम्बन्धित छलफल, प्यानल अन्तरक्रिया, अन्तर्राष्ट्रिय प्रविधि उत्पादन गर्ने कम्पनीहरुसँग दुग्ध व्यवसायीकरण र उद्यम आधारित अन्तरक्रिया लगायतका कार्यक्रम हुने बगालेले जानकारी दिए ।

संघका अध्यक्ष बगालेका अनुसार चितवनमा प्रतिलिटर ३ लाख ५० हजार लिटर दुध उत्पादन हुन्छ भने दुई लाख लिटर चितवन बाहिरका जिल्लामा निर्यात हुने गरेको छ ।

चितवनमा ४० हजार दुग्ध किसान रहेका छन् । यहाँका किसानको दुध संकलन गर्न १ सय १५ वटा दुग्ध उत्पादक सहकारी संस्था रहेका उनले जानकारी दिएका छन् ।