कोशी प्रदेशमा नयाँ सरकार गठनका लागि दाबी पेश गर्न दिएको समय आज सकिँदै छ । सर्वोच्च अदालतले यसअघि गठन गरेको नेपाली काँग्रेसको सरकारलाई अवैधानिक करार गरि दिएपछि पुनः सरकार गठनको आह्वान गरिएको हो ।

प्रदेश प्रमुख परशुराम खापुङका अनुसार संविधानको धारा १६८ को उपधारा २ अनुसार सरकार गठनका लागि दिएको समय आज अपराह्न ५ बजे सकिने लागेको हो । यसअघि सभामुख बाबुराम गौतमको समेत समर्थनमा मुख्यमन्त्री बनेका नेपाली काँग्रेसका थापाको नियुक्ति सर्वोच्च अदालतले बदर गरिदिएपछि कोशीमा नयाँ सरकार गठनको प्रक्रिया सुरु भएको हो । जसअनुसार आज नयाँ सरकारका लागि दाबी पेश गरिसक्नु पर्ने हुन्छ ।

कोशी प्रदेशमा कांग्रेस नेतृत्वको गठबन्धनसँग सभामुख बाहेक ४६ सांसद छन् भने सत्तारुढ इतर रहेका नेकपा एमालेसँग ४० तथा राप्रपासँग ६ जना सांसद रहेका छन् । सरकार बनाउन ४७ मत आवश्यक पर्ने भएपछि कोशी सरकार गठनमा समस्या देखा परेको छ ।

अहिलेसम्म सरकार बनाउन एक सांसदको मत पुगेको छैन । सत्ता गठनबन्धनले राप्रपालाई फकाउन असफल भएपछि सभामुखको राजीनामा गराएर सरकार बनाउने तयारी गरेको छ । यता एमाले एकमत नपुगेपछि अहिलेसम्म अन्योलमा छ ।