वाणिज्य बैंकहरूले निक्षेपमा हालकै ब्याजदरलाई असारमा पनि निरन्तरता दिने भएका छन् । नेपाल बैंकर्स संघको बैठकले मंगलबार असारका लागि निक्षेपको ब्याजदर यथावत् राख्ने निर्णय गरेको हो ।

निक्षेपको ब्याजदर स्थिर रहे पनि कर्जाको भने घट्ने संघले जनाएको छ ।

हाल ४.२ प्रतिशतको अधिकतम सीमा रहेको स्प्रेड दर असार मसान्तभित्र ४ प्रतिशतको सीमाभित्र ल्याउन राष्ट्र बैंकको निर्देशन छ । निक्षेपमा बैंकहरूले दिने ब्याजदर र कर्जामा लिने ब्याजको औसत अन्तर नै स्प्रेड दर हो । स्प्रेड दर घटाउन निक्षेपको औसत ब्याजदर यथावत् रहँदा कर्जाको औसत ब्याज घटाउनुपर्छ ।

पछिल्लो तीन महिनाको आधार दरअनुसार मासिक रूपमा कर्जाको ब्याजदर परिवर्तन गर्नुपर्ने राष्ट्र बैंकको व्यवस्थाले हरेक महिना कर्जाको ब्याजदर परिवर्तन हुन थालेको छ ।

ब्याजदर घट्दै जाँदा सेयर बजारको परिसूचक नेप्से उकालो लागेको छ । केही दिनयता उकालो लागेको सेयर बजारको परिसूचक नेप्से २०२० अंकमा पुगेको छ । तीन दिनमा नेप्से ८१ अंक बढेको छ ।