बुटवलमा आयोजित प्रथम मेयर कप तथा पाँचौँ राष्ट्रिय खुला लनटेनिस प्रतियोगिता–२०७९ आज सम्पन्न भएको छ ।

प्रतियोगिताअन्तर्गत खुला पुरुष र महिला एकलतर्फ प्रदीप खड्का र अभिलाषा विष्ट विजयी भएका छन् । आज भएको पुरुषतर्फको फाइनल खेलमा बुटवलका रितिक रानालाई हराउँदै प्रदीपले उपाधि जितेका हुन् ।

यता महिला एकलतर्फको उपाधि विष्ट माहिका रानालाई फाइनलमा सोझो सेटमा पराजित गर्दै उपाधि जित्न सफल भएकी हुन् । प्रतियोगिता उपाधि विजेताले रु ६० हजार, कप, मेडल, प्रमाणपत्र तथा उपविजेताले रु ३० हजार, कप, मेडल, प्रमाणपत्र प्राप्त गरेका छन् ।

यसैगरी ३५ वर्ष उमेर समूह पुरुष एकलको उपाधि सन्तोष खत्रीले जित्न सफल भएका छन् । उक्त समूहतर्फको पनि आजै सम्पन्न फाइनल खेलमा खत्रीले सिमान्त गुरुङलाई सोझो सेटमा पराजित गर्दै उपाधि हात पारेका हुन् ।

यसैगरी ५५ वर्ष उमेर पुरुष एकलको उपाधि विमल गुरुङले हात पारेका छन् । फाइनलमा कमल थापालाई सोझो सेटमा पराजित गर्दै गुरुङले उपाधि हात पारेका हुन् । प्रतियोगितमा विजयी तथा उपविजेता खेलाडीलाई आज बुटवल उपमहानगरपालिकाका नगरप्रमुख खेलराज पाण्डे र श्री २२ नं बाहिनीका उपरथी नवराज गुरुङले पुरस्कार वितरण गरे ।

प्रकाशित समय : १८:३१ बजे