प्रभु लाइफ इन्स्योरेन्स लिमिटेडले बीमित परिवारलाई दाबी भुक्तानी गरेको छ । २०७८ पुस २८ गते प्रभु लाइफमा २० लाख बिमांक रकमको जीवन बिमा गरेका गणेश विश्वकर्माको यही असोज २८ गते मृत्यु भएको थियो ।

पहिलो प्रिमियमस्वरुप १ लाख ३६ हजार ६५४ रकम मात्र बिमा शुल्क बुझाएका उनको दोस्रो किस्ता रकम (बिमा शुल्क) बुझाउने समयअगावै मृत्यु भएको थियो । प्रभु लाइफले बीमित स्वर्गीय गणेश विश्वकर्माका श्रीमती सन्तमाया मगर र निजका बुबा धन बहादुर मगरलाई धरान शाखा कार्यालयमा एक कार्यक्रमका बीच २० लाख रूपैयाँकाे चेक हस्तान्तरण गरेको थियो । प्रभु लाइफका प्रदेश १ प्रमुख पुष्कर भट्टराई र धरान शाखा प्रमुख सन्तोष राईले संयुक्त रुपमा परिवारलाई सो चेक हस्तान्तरण गरेका थिए ।

प्रभु लाइफका प्रदेश १ प्रमुख पुष्कर भट्टराईले जीवन बिमालाई विश्वासनीय बनाउन दाबी भुक्तानीलाई सरल, सहज र चुस्त रुपमा गरिने कम्पनीको नीति रहेको प्रष्ट पारे । जीवन बिमाले बीमित परिवारलाई यस किसिमका अकल्पनिय घटनाबाट आइपर्ने आर्थिक जोखिम बहन गर्ने बताए । ‘बीमित परिवारलाई आफ्नो जीवनयापनमा केही मात्रामा सहजता आउने विश्वास लिएका छौं,’ प्रभु लाइफका प्रदेश १ प्रमुख भट्टराईले भने ।

दाबी भुक्तानी कार्यक्रममा धरान शाखामा कार्यरत सिनियर एजेन्सी मेनेजर, एजेन्सी मेनेजर, अभिकर्ता र स्थानीयहरुको सहभागिता रहेको थियो ।

प्रकाशित समय : १२:२० बजे