आइएमई मोटर्सले अशोक लेल्याण्डको भाइकिङ १२एम प्राइम बस नेपाली बजारमा ल्याएको छ । ४४ सिट बसका चारवटा युनिटको वितरण पनि उद्घाटनको क्रममा सोही दिन गरिएको थियो । अशोक लेल्याण्डको नेपालका लागि आधिकारिक वितरक आइएमई मोटर्स हाे ।

यस अवसरमा आइएमई मोटर्सका प्रमुख कार्यकारी अधिकृत हेमन्त पुराणिकले भने, ‘ग्राहकहरूले पहिले नै नेपालमा अशोक लेल्यान्डका बस र अन्य सवारीसाधनलाई रुचाउँदै आएका छन् र अझ धेरै सुविधा र अत्याधुनिक र उत्कृष्ट प्रविधि सहितको १२ मिटर भाइकिङ बस सञ्चालनमा ल्याउन पाउँदा हामी खुसी छौं । लामो दुरीको यात्रा अब ग्राहकका लागि थप सहज र सुरक्षित र सञ्चालक र मालिकहरूका लागि बढी लाभदायक हुने कुरामा निश्चित छ ।’

बसमा टर्बो चार्जर र इन्टरकुलर सहितको ५,७६० सीसी एच सिरिज ६ सिलिन्डर डिजेल इन्जिन छ, जसले १८० एचपी पावर र ६७० एनएम टर्क जेनेरेट गर्छ । यो बसमा इनलाइन इन्धन पम्प छ, जसले यसको मर्मत खर्च घटाउँछ । यसमा न्युमेटिक एक्च्युएसन सहितको १५ इन्चको क्लच र ओभरड्राइभ सहितको जेटएफ६ फरवार्ड स्पीड सिन्क्रोमेश गियरबक्स छ। यसले जर्मनीमा उत्पादित गियरबक्सको आयु बढाउन भूमिका खेल्छ ।

इन्टिग्रल पावर स्टेयरिङ र डबल एक्टिङ शक अब्जर्बरसहितको वेभलर फ्रन्ट सस्पेन्सन र लेभलिङ भल्भसहितको रियर एयर सस्पेन्सनले बसलाई आरामदायी बनाउन भूमिका खेलेको छ । एबीएस र सेवा ब्रेक, पार्किङ ब्रेक र सहायक ब्रेकजस्ता अन्य विभिन्न प्रविधिहरूले बसलाई सजिलै रोक्न वा सञ्चालनमा ल्याउन भूमिका खेल्छन् । सहायक ब्रेकको रूपमा इलेक्ट्रो-चुम्बकीय रिटार्डरले ब्रेक दक्षता र ब्रेक जीवन बढाउन मद्दत गर्दछ ।

यो बसमा बोल्ट क्रस मेम्बर सहितको बलियो ११ इन्च लडर प्रकारको च्यासिस छ, जसका कारण बस निकै सुरक्षित मानिन्छ । अशोक लेल्याण्ड भाइकिङ १२एम प्राइममा ३५० लिटरको इन्धन ट्यांकी र ६,२०० एमएम लामो ह्वीलबेस पनि छ ।

प्रकाशित समय : १४:१५ बजे