मकवानपुर–२ मा नेकपा एमालेको उम्मेदवार महेश बर्तौला विजयी भएका छन् । सत्तारुढ गठबन्धनका उम्मेदवार नेकपा एकीकृत समाजवादिका विरोध खतिवडालाई पराजित गर्दै बर्तौला विजयी भएका हुन् ।

बर्तौलाले निकटतम् प्रतिस्पर्धी खतिवडालाई ४ हजार ५२० मतान्तरले पराजित गरेका हुन् । ८६ हजार ३ सय १ मत खसेकोमा बर्तौलाले ३४ हजार ९ सय १६ मत पाएर विजयी हुँदा खतिवडाले ३० हजार ३ सय ९६ मत पाए ।

बर्तौला निर्वाचित भएसँगै खतिवडाको अपराजित यात्रा टुंगिएको छ । यसअघि उनी लगातार ४ पटक निर्वाचित भएका थिए । अहिले पार्टी विभाजनपछि एमाले अध्यक्ष केपी शर्मा ओलीको खरो विरोध बनेका विरोध खतिवडा आफ्नै चेलासँग हारेका हुन् ।

बहुदलीय प्रजातन्त्र पुनःस्थापनापछि लडेका सबै चुनाव जितेका खतिवडा आफैले राजनीतिमा लिएका बर्तौलासँग प्रतिस्पर्धामा थिए ।

खतिवडाकै ‘स्कूलिङ’बाट बर्तौला राजनीतिमा आएका हुन् । एमाले विभाजन हुनअिघ उनीहरूले नेता(कार्यकर्ताका रुपमा सँगसँगै काम गरेका थिए ।

२०७४ सालको प्रतिनिधि सभा सदस्यको निर्वाचनमा खतिवडालाई जिताउन बर्तौला पनि खटिएका थिए। उनले नै खतिवडाका लागि विद्यार्थी संगठन परिचालन गरेका थिए ।

एमाले नगर कमिटीका सचिव बोलबहादुर कार्कीका अनुसार खतिवडा र बर्तौला २०६२(६३ को जनआन्दोलनमा सँगसँगै पक्राउ परेका थिए ।

बर्तौलाले विद्यार्थी राजनीतिबाट चर्चा बटुलेका हुन् । दुई पटक मकवानपुर बहुखुमी क्याम्पसको स्ववियू सभापति बनेका उनी युवा तथा विद्यार्थीमाझ लोकप्रिय छन्। मकवानपुरकै भीमफेदी गाउँपालिका–९ नामटारका उनी २०७८ असोजबाट मात्रै पार्टी राजनीतिमा प्रवेश गरेका हुन् ।

अहिले उनी एमाले बागमती प्रदेश कमिटीको उपमहासचिव छन् । युवा तथा विद्यार्थीमाझ राम्रो छबि भएकैले उनले छोटो समयमै सांसदको टिकट पाउन सफल भएको एमाले नेताहरू बताउँछन् ।