‘स्ट्यान्डअप कमेडियन’ अपूर्व क्षितिज सिंहमाथि प्रहरीले जुन व्यवहार गर्दै आएको छ, त्यसले नेपालको राज्य संयन्त्र कसले, कहाँबाट र कसरी सञ्चालन भइरहेको छ ? भनेर प्रश्न उठेको छ ।

पटक-पटक सार्वजनिक रुपमै माफी मागिसक्दा पनि र युट्युब च्यानलबाट भिडियो हटाइसक्दा पनि अपूर्वमाथि राज्य संयन्त्र जुन शैलीले प्रस्तुत भइरहेको छ, त्यसले हाम्रो राज्य सयन्त्र कति नालायक छ भन्ने पुष्टि गर्छ ।

नेवारी समुदायमाथि गरेको एउटा कमेडीलाई लिएर उजुरी परेपछि अपूर्वलाई यसअघि नै १२ दिन प्रहरीले हिरासतमा राखिसकेको हो । दोस्रो पटक पनि उही बिषयलाई लिएर अपूर्वलाई फेरि हिरासतमा राखिनुको औचित्य देखिँदैन । किनकी, यसअघि जमानीमा छाडिएका र असोज ३१ मा आफैं हाजिर हुन आएका अपूर्वलाई फेरि थुनामा राख्नुको कारण के हो ? भन्नेबारे प्रहरीले सार्वजनिक रुपमा केही बोलेको छैन ।

के प्रहरीले विवेक गुमाएको हो ? वा कसैको उक्साहटमा अपूर्वमाथि पुर्वाग्रही भएर प्रस्तुत भएको हो ? जवाफ त राज्यले दिनैपर्छ । हो, अपूर्वले नेवार समुदायको चित्त दुख्नेगरी कमेडी गरेकै हुन् । उनलाई यस कुराको बोध पनि भएको देखिन्छ । दुई हात जोडेर उनले माफी पनि मागे । भिडियो पनि हटाए । हिरासत पनि भोगे । तर यति गर्दागर्दै पनि उनलाई मानसिक रुपमा हदैसम्म गलाउने प्रहरीले जुन जालो बिछ्याएको देखियो, त्यसले राज्य संयन्त्र चुकेको संकेत गर्छ । उनले जे गल्ती गरे, त्योभन्दा बढी सजाय भोगिसकेका छन् । उनीमाथि साँच्चै नै ज्यादती भएको छ । अति गरे त्यसको परिणाम खती हो भन्ने कुरा राज्यले बुझ्न ढिलो गर्दा त्यसको नकारात्मक असर पर्ने हाम्रै समाजमा हो ।

अपूर्वको बिषयलाई हाम्रो राज्य संयन्त्र नै साम्प्रदायिक रङ दिने कुत्सित नियतसाथ अघि बढ्न खोजेको हो भने त्यसले कस्तो परिस्थिति निम्त्याउला ? हेक्का होस, सरकार । होइन भने सरकारले भनोस- अपूर्व लोकतन्त्र, गणतन्त्र र यो संविधानका लागि खतरा हुन् । नत्र राज्यले गर्ने पटमुर्ख्याईंलाई जनताले सर्वस्वीकार्य मान्ने दिन त राणा शासनको अन्त्यसँगै बिदा भइसकेको नबिर्सौं ।

राज्य संयन्त्रको दुरुपयोग गरेर जसरी अपूर्वमाथि अन्याय गर्न खोजिएको छ, त्यसको छिनोफानो सम्मानित अदालतले गर्ने नै छ । किनकी, यो बिषयमा अपूर्वलाई बिनासर्त रिहा गर्नुपर्छ भन्ने कुरा बुझ्न कानूनको नौ सिङ पढिरहनु पर्दैन । तर यति हुँदाहुँदै पनि राजनीतिक पंक्ति र अभियानकर्मीहरुको मुखमा बुझो लागेको देख्दा उदेक लाग्छ ।

तर पनि आशा गरौं- घामको उज्यालो रहेसम्म हाम्रो राज्य, नेता र अभियन्ताको घैँटोमा घाम लागि पो हाल्छ कि !

प्रकाशित समय : १५:४३ बजे