कुमारी बैंक लिमिटेडले ‘११ प्रतिशत केबीएल डिबेन्चर २०८९’ को बाँडफाँट गरेको छ ।

३० लाख कित्ता ऋणपत्र सार्वजनिक निष्काशन तर्फ माग भए बमोजिम तथा व्यक्तिगत तवरमा आवेदन आएकोमा शुक्रबार समानुपातिक आधारमा बाँडफाँट गरिएको बैंकले जनाएको छ । बैंकले १० (दस) वर्षे अवधि तथा वार्षिक ११ प्रतिशत व्याजदर भएको ‘११ प्रतिशत केबीएल डिबेन्चर २०८९’ को एक हजार रूपैयाँ अंकित दरको ३० लाख कित्ता ऋणपत्रको निष्काशन गरेकोे थियो ।

उक्त ३ अर्ब बराबरको ऋणपत्रमध्ये १८ लाख कित्ता ऋणपत्र व्यक्तिगत तवरबाट बिक्री गरिने तथा १२ लाख कित्ता ऋणपत्र सर्वसाधारणको लागि सार्वजनिक निष्काशनबाट बिक्री गरिने जनाएको थियो । सर्वसाधारण नेपालीको लागि गत भदौ १७ देखि ३१ गतेसम्म निष्काशन तथा बिक्री खुल्ला गरिएको थियो । व्यक्तिगत तथा सार्वजनिक गरी जम्मा ३ अर्ब बराबरको निष्काशनमा ३ अर्ब १५ करोड बराबरको आवेदन प्राप्त भएको थियो ।

रितपूर्वक आवेदन दिने सम्पूर्ण आवेदकलाई आज ३० लाख कित्ता ऋणपत्र सार्वजनिक निष्काशनतर्फ माग भएबमोजिम तथा व्यक्तिगत तवरमा आवेदन आएकोमा समानुपातिक आधारमा बाँडफाँड गरिएको बैंकले विज्ञप्तिमार्फत जनाएको छ ।

कुमारी बैंकले देशव्यापी १९९ शाखा सञ्जाल, १९५ एटीएम, ५३ शाखारहित बैंकिङ इकाई तथा ३४ एक्सटेन्सन काउन्टरबाट सेवा प्रदान गर्दै आएको छ ।