लुम्बिनी विकास बैंकले सात प्रकारका कर्जा एकल अंक ब्याजदरमा प्रदान गर्ने भएको छ । बैंकले लुम्बिनी घर कर्जा, व्यक्तिगत कर्जा, अटो कर्जा, शैक्षिक कर्जा, साना तथा मझौला व्यवसाय कर्जा, लघुवित्त तथा आर्थिक विपन्न वर्ग सहायता कर्जा र कृषि कर्जा ९.९२ प्रतिशत ब्याजमा प्रदान गर्ने सार्वजनिक गरेको हो ।

ब्याजदरमा कर्जा सुविधा प्राप्त गर्न सातै प्रदेशमा रहेका ६८ वटा शाखा कार्यालयबाट आवेदन दिन सकिने बैंकले जनाएको छ । सम्पूर्ण आवश्यक कागजातसहित आवेदन दिएको तीन कार्यदिनमै कर्जा स्वीकृतिको निर्णय हुने पनि बैंकले स्पष्ट पारेको छ ।

लुम्बिनी विकास बैंकले ‘निरन्तर सहयात्रा’ भन्ने नाराका साथ देशभर ६८ शाखा र १६ एटिएमबाट २ लाख ५३ हजार ग्राहकलाई उच्चस्तरीय आधुनिक एवं नवीनतम प्रविधिसहितको बैंकिङ सेवा प्रदान गर्दै आएको जारी विज्ञप्तिमा उल्लेख छ । बैंकले २०७७ असार मसान्तसम्ममा २९ अर्ब ७० करोड निक्षेप संकलन गरी २५ अर्ब ७१ करोड कर्जा प्रवाह गरेको छ ।

बैंकले ग्राहकलाई निशुःल्क डेविट कार्ड वितरण गरी उक्त कार्डबाट नेपालभित्र जुनसुकै बैंकका भिजा नेटवर्क भएको एटिएम मेसिनबाट रकम झिक्दा कुनै पनि अतिरिक्त शुल्क नलाग्ने व्यवस्था मिलाएको छ । साथै कोभिड–१९ को विषम परिस्थिति अन्त्य नभइसकेको हुँदा सम्भव भएसम्म डिजिटल माध्यमबाट बैंकिङ कारोबार गर्न पनि बैंकले आग्रह गरेको छ ।

प्रकाशित समय : १६:५४ बजे