क्यानडा भ्रमणमा रहेको नेपाली क्रिकेट टोलीले अभ्यास खेलमा ओन्टारियो क्रिकेट क्लबलाई ६९ रनले पराजित गरेको छ । गएराति राति भएको खेलमा नेपालले दिएको २ सय २१ रनको लक्ष्य पछ्याएको ओन्टारियोले ४२ ओभर ५ बलमा अलआउट हुँदै १ सय ५१ रन बनाउन सक्यो ।

ओन्टारियोका रियाजखान पठानले ३६ रन बनाउँदा कप्तान नरेश बुढाऐरले २९ रन जोडे । यस्तै निकोलस मनोहरले २५ तथा जश शाहले २० रन बनाए । नेपालका पवन सरार्फले ३ विकेट लिए । दीपेन्द्रसिंह ऐरी, आरिफ शेख र किशोर महतोले २२ विकेट लिए । त्यसअघि पहिले ब्याटिङ गरेको नेपालले निर्धारित ५० ओभरमा ८ विकेट गुमाएर २ सय २० रन बनाएको थियो । नेपालका लागि विनोद भण्डारीले ५७ रनको अर्धशतकीय इनिङ खेले ।

यस्तै आसिफ शेखले ४२ रन जोड्दा देव खनालले २७ रन बनाए । बसिर अहमेदले २४ रन जोड्दा दीपेन्द्रसिंह ऐरी र आरिफ शेखले सामान १९ रन जोडे । कुशल भुर्तेलले १३ रन जोडे भने आदील आलम १० रन अविजित रहे । ओन्टारियोको शील पटेलले ३ विकेट लिए ।

क्यानडासँगको सिरिजअघि नेपालले अभ्यास खेल खेलेको हो । अब नेपालले क्यानडाको राष्ट्रिय टोलीसँग दुई खेलको एकदिवसीय सिरिज खेल्नेछ । त्यसपछि नेपालले स्कटल्याण्डमा 'विश्वकप लिग टू'अन्तर्गतको त्रिकोणात्मक एकदिवसीय सिरिज खेल्नेछ ।

प्रकाशित समय : १५:२७ बजे