सांग्रिला डेभलपमेन्ट बैंक लिमिटेडलेले बालुवाटारस्थित आफ्नो केन्द्रीय कार्यालय परिसरमा रहेका शौचालय सार्वजनिक शौचालयको रुपमा सर्वसाधारण नागरिकलाई निशुल्क प्रयोग गर्न दिने भएको छ । निर्णयको सम्झौता पत्रमा बैंकका प्रमुुख सञ्चालन अधिकृत अपूर्व प्रसाद जोशी र काठमाडौं महानगरपालिका मातहतमा रहेको सार्वजनिक-निजी साझेदारी एकाईका नुर निधि न्यौपानेले हस्ताक्षर गरे ।

सम्झौताअनुसार बैंकको केन्द्रीय कार्यालय परिसरमा रहेका शौचालय सार्वजनिक शौचालयको रुपमा सर्वसाधारणले प्रयोग गर्न सक्नेछन् । बैंकको यस निर्णयले सर्वसाधारण नागरिकलाई सहजताका साथ शौचालय उपलब्ध गराउने काठमाडाैं महानगरपालिकाको प्रयासमा सहयोग पुर्‍याउने विश्वास बैंकले लिएको छ । केन्द्रीय कार्यालय बिहान ९.३० देखि ५ बजेसम्म मात्र खुल्ला रहने भएकाले उक्त समयमा कार्यालयको परिसरमा रहेका शौचालय सर्वसाधारणले प्रयोग गर्न सक्ने बैंकले जनाएको छ ।

काठमाडौं महानगरपालिकाले महानगरभित्र सञ्चालनमा रहेका होटल, रेष्टुरेण्ट, बैंक, व्यवसायिक कम्प्लेक्स, सपिङ मल, गैरसरकारी संस्था तथा अन्य व्यवसायीलाई ऐच्छिक रुपमा आफ्नो शौचालय सार्वजनिक प्रयोगका लागि खुला गर्न आह्वान गरेको छ ।

प्रकाशित समय : ००:०४ बजे