होस्टेलमा बस्दै आएका तीन छात्रामाथि यौन दुर्व्यवहार गरेकाे आरोपमा जाेरपाटीस्थित सर्वनाम शिक्षालयका होस्टेल वार्डेन रामजी बस्नेत पक्राउ परेका छन् । यौन दुर्व्यवहार गरेको जाहेरी परेपछि प्रहरीले वार्डेन बस्नेतकाे खोजी सुरु गरेको थियो ।

उजुरीपछि भागेर रामेछाप पुगेका वार्डेनलाई रामेछाप प्रहरीको सहयोगमा पक्राउ गरिएको महानगरीय प्रहरी परिसर काठमाडौंका प्रवक्ता दिनेशराज मैनालीले बताए । प्रवक्ता मैनालीका अनुसार बस्नेतलाई हिरासतमा लिएर अनुसन्धान सुरु गरिएको छ ।

आरोपी वार्डेनलाई पक्राउ नगरिएको भन्दै छात्रा र अभिभावकले आन्दोलन गरेका थिए । उनीहरूले शिक्षालयअगाडि नाराबाजी गर्दै आरोपी वार्डेनलाई तत्काल पक्राउ गरी कारबाही गर्न माग गरेका थिए ।

प्रकाशित समय : ००:४७ बजे