एनआइसी एशिया बैंक लिमिटेडको नायब प्रमुख कार्यकारी अधिकृत (सीईओ)मा सन्तोष कुमार राठी नियुक्त भएका छन् । गत आइतबार बसेको सञ्चालक समितिको ५४५औं बैंठकले राठीलाई बैंकको नायब सीईओमा नियुक्त गरेको हो ।

बैंकको सहायक सीईओको रुपमा कार्यरत उनलाई नेपाल राष्ट्र बैंकबाट जारी गरिएको एकीकृत निर्देशन २०७८ को इ.प्रा.निर्देशन नं. ६/०७८ को बुँदा नं. ७ (१) (छ) मा भएको व्यवस्थाबमोजिम बैंकको सञ्चालक समितिले आगामी साउन १ देखि लागू हुनेगरी नायब सीईओ पदमा नियुक्त गर्ने निर्णय गरेको हो ।

२०६४ मंसिर १९ देखि तत्कालीन बैैंक अफ एशिया नेपाल लिमिटेडको विराटनगर शाखाको शाखा प्रबन्धकको जिम्मेवारीबाट एनआइसी एशिया बैंकको सेवामा जोडिएका राठी बैंकको विराटनगरस्थित प्रादेशिक कार्यालयको प्रमुख, विभिन्न इकोसिष्टमहरुको प्रमुख र बैंकको सहायक सीईओ हुँदै नायब सीईओमा नियुक्त भएका हुन् । समग्र बैंक व्यवस्थापन, जोखिम व्यवस्थापन, मानव संशाधन व्यवस्थापन, व्यवसाय विस्तार तथा विविधिकरणलगायत विभिन्न रणनीतिक क्षेत्रमा उनले विशेष दक्षता हासिल गरेको बैंकले जनाएको छ । बैंकका अनुसार अनुकरणीय लगन, परिश्रम, दृढता, संकल्प र दक्षता निरन्तर प्रदर्शन गर्दै बैंकको रुपान्तरणमा पुर्‍याएको अतुलनीय योगदानको कदर एवं उच्च मूल्यांकन गर्दै बैंकले उनलाई नायब सीईओकोे पदमा नियुक्त गरेको हो ।

नेपालको बैंकिङ क्षेत्रमा करिब २० वर्षको विभिन्न कार्यअनुभव संगालेका राठीले वाणिज्यशास्त्रमा स्नातकोत्तरसम्मको अध्ययन पूरा गरेका छन् । उनको यस नियुक्तिले बैंकले आगामी दिनमा अझ उन्नत उचाई हासिल गर्ने बैंकले विश्वास लिएको छ ।

प्रकाशित समय : २३:४६ बजे