ओपोले गेम डेभ्लपर्स कन्फरेन्स २०२२ (जीडीसी)मार्फत स्मार्टफोनका लागि उद्योगकै पहिलो रे ट्रेसिङ एप्लिकेशन-कलरओएस रे ट्रेसिंग थ्रिडी वालपेपर्स अनावरण गरेको छ । कम्पनीद्वारा जारी विज्ञप्ति अनुसार कार्यक्रममा उपस्थित व्यक्तिहरूले चीनमा सार्वजनिक ओपोको नयाँ फ्ल्यागशिप स्मार्टफोन, ओपो फाइन्ड एक्स ५ प्रो मार्फत मल्टिपल रियल-टाइम रे ट्रेसिङ वालपेपरको प्रत्यक्ष अनुभव गर्ने थिए । थ्रिडी वालपेपर एप्लिकेशन यसै वर्ष भित्रै एपीके मार्फत सार्वजनिक गर्ने तयारी भइरहेको छ ।

प्रकाशको भौतिक व्यवहारलाई अनुकरण गर्ने रे ट्रेसिङ एक ग्राफिक्स रेन्डरिङ प्रविधि हो । यसको उपयोग पछिल्लो समयमा कम्प्युटरका लागि अपनाइएको छ । रे ट्रेसिङ प्रविधि अपनाइ, थ्रिडी वालपेपरले प्रयोग योग्य फ्रेम दरमा वास्तविक समयमा प्रकाश रेन्डर गर्न सक्छन् । यसले गर्दा वस्तुको छायाँ, प्रतिबिम्ब र अपवर्तन अझ जीवन्त र वास्तविक देखिन्छ । यसले गर्दा घुमाउने, ट्याप गर्ने र लहराउने जस्ता हातका इशाराको प्रयोग गरी आफ्ना वालपेपरसँग अन्तरक्रिया गर्न सक्ने सुविधा प्रदान गर्छ ।

ओपोले सन् २०१८ को सुरुदेखि नै आफ्नो रे ट्रेसिङ प्रविधि विकासको थालनी गरेको थियो । कम्पनीले सुरुमा विद्यमान मोबाइल उपकरणमा रे ट्रेसिङलाई समावेश गराउन हाइब्रिड रेन्डरिङ विधि अपनाएको थियो । कलरओएस रे ट्रेसिङ थ्रिडी वालपेपरका लागि ओपोले मिडियाटेक डाइमेन्सिटी ९००० चिपसेटको सम्भाव्यतालाई पूर्ण प्रयोग गर्दै फाइन्ड एक्स ५ प्रो (डाइमेन्सिटी संस्करण) मा हाइब्रिड आर्किटेक्चर र समर्पित हार्डवेयर कोर अपनाएर रे ट्रेसिङ कार्य सम्पादनलाई गति दिन नयाँ अवधारणा अपनाएको हो ।

सन् २०२२ भित्रै ओपोले फाइन्ड एक्स५ प्रो (डाइमेन्सिटी भर्सन)का प्रयोगकर्ताका लागि थ्रिडी वालपेपर एप्लिकेशनलाई एपिकेका रुपमा र विश्वभरका डेभलपर्स, कलाकार, डिजाइनरले आफ्नो रचनात्मकता प्रस्तुत गर्न सकुन् भन्ने सोचका साथ एसडिके प्योकजका रुपमा उपलब्ध गराउने जानकारी दिइएको छ ।

प्रकाशित समय : २३:४२ बजे