ट्वान्टी-२० विश्वकप क्रिकेटमा छनोट हुन नसकेको नेपालको घाउ अझै सुक्न पाएको छैन । अघिल्लो महिना ओमानमा ट्वान्टी-२० विश्वकप छनोट यात्रामा यूएई नेपालको अवरोध बनेको थियो । प्रतियोगितामा उत्कृष्ट खेले पनि नेपाललाई निर्णायक खेल (सेमिफाइनल)मा यूएईले कुनै अवसर नै दिएको थिएन ।

अहिले युएईमा भइरहेको आईसीसी क्रिकेट विश्वकप लिग टु अन्तर्गत त्रिकोणात्मक श्रृंखलामा नेपालले शुक्रबार दोस्रो खेल घरेलु टोली युएई विरुद्ध खेल्दैछ । श्रृंखलामा नेपाल र युएई दुवैले यसअघि पपुवा न्यु गिनी (पीएनजी)लाई हराएका छन् । त्यसैले दुवै टोली जितको लयलाई कायम राख्ने योजनासहित मैदान उत्रिनेछन् ।

युएईले पहिलो खेलमा पीएनजीलाई १७६ रनमा रोक्दै ७ विकेटको सहज जित हात पारेको थियो । तर नेपालले भने पीएनजीलाई हराउन संघर्ष गर्नुपरेको थियो । पीएनजीले दिएको २०५ रनको लक्ष्य नेपालले ८ विकेट गुमाएर ४ बल अगाडि पूरा गरेको थियो । रोहित कुमार पौडेलको धैर्यपूर्ण ब्याटिङ र करण केसीको आक्रामक ब्याटिङमा नेपाल विजयी भएको थियो ।

युएई पछिल्लो समय एसोसिएट टिममा उत्कृष्ट फर्ममा रहेको छ । युएईले यस श्रृखंला अघि पनि ओमान र नामिबिया सम्मिलित लिग टु कै श्रृंखला खेलेको थियो । त्यसबाट पनि उनीहरुलाई राम्रो तयारी मिलेको छ । नेपालले युएईलाई उसैको मैदानमा पराजित गर्न अझ मिहिनेत गर्नुपर्ने देखिन्छ ।

प्रकाशित समय : १४:१८ बजे