लुम्बिनी विद्युत उद्योग प्रालिले बुटवलमा ‘पावर पार्टनर्स मिट-२०७८’ सम्पन्न गरेको छ । कम्पनीले लिट्मस केवल ब्राण्डअन्तर्गत आधुनिक जर्मन प्रविधि एवं अत्याधुनिक पूर्वाधार प्रयोग गरी विभिन्न प्रकारका गुणस्तरीय तार र केबलहरू उत्पादन गर्दै आएको छ ।

कार्यक्रममा लिट्मस केवलका ब्राण्ड एम्बेसेडर महानायक राजेश हमाल लगायत रूपन्देही जिल्लाका उच्च पदस्थ व्यक्तिको पनि सहभागिता रहेको थियो ।

सम्मेलनलाई थप अन्तर्क्रियात्मक बनाउन विभिन्न मनोरञ्जनात्मक कार्यक्रमहरू पनि प्रस्तुत गरिएको थियो । साथ-साथै पार्टनरहरूलाई उल्लेखनीय कामका लागि प्रमाण–पत्र तथा अवार्डहरु हस्तान्तरण गरिएको थियो । साथै कम्पनीका पदाधिकारीहरूले सबै पार्टनरहरूसँग भेट गरी उनीहरूका जिज्ञासा पनि लिएका थिए ।

सम्मेलनमा उपस्थित सम्पूर्णलाई सम्बोधन गर्दै कम्पनीका अध्यक्ष तथा प्रबन्ध निर्देशक रोहित गुप्ताले मेहेनत र ग्राहकको सेवाले गर्दा कम्पनीले नयाँ उचाई हासिल गरेको बताए । उनले भने, ‘यहाँहरुको मेहनत र ग्राहकको साथले हामीले नयाँ उचाई हासिल गरेका छौं । यसको लागि देशभरका डिलरहरुप्रति आभार व्यक्त गर्दछौँ । हामीहरूले यो उचाई कायम राख्न अझै बढी ग्राहक सेवामा केन्द्रित रही बिक्री सेवामा सुधार गर्दै जानुपर्छ । साथै, ग्राहकहरूको विश्वास जित्दै कम्पनीको लक्ष्य हासिल गर्न हामी निरन्तर लागि पर्नुपर्छ ।’

सन् १९७७ मा स्थापित लुम्बिनी विद्युत उद्योग प्रालि नेपालको पहिलो आल्मुनियम कन्डक्टर स्टील रेनफोर्सड (एसिएसआर) कन्डक्टर निर्माण कम्पनी हो । कम्पनीले हालै नयाँ संरचनाको विकास गरी विभिन्न उत्पादनहरू बजारमा बिक्री वितरण गर्दै आइरहेको छ ।

विगत चार दशकदेखि विभिन्न प्रकारका तार र केबलहरू उत्पादन गर्दै आएको यस कम्पनीले हालै जर्मन प्रविधियुक्त नयाँ एडभान्स जर्मन टेक्नोलोजी मेसिनहरुबाट आफ्ना उत्पादन गर्दै आइरहेको छ ।यससँगै कम्पनीले आफ्नो उत्पादन क्षेत्र विस्तार गर्दै नेपालकै अग्रणी एवं ठूलो कम्पनी बन्न सफल भएको छ ।

लुम्बिनी विद्युत उद्योग प्रालि नेपालको सबैभन्दा ठूलो निजी औद्योगिक एवं व्यापारिक समूहमध्ये एक, रमेश कर्पको भगिनी संस्थाका रुपमा रहँदै आएको छ । कम्पनी बुटवल औद्योगिक क्षेत्र, बुटवलमा अवस्थित छ ।

वर्षौँदेखि लिट्मस केवलले ग्राहकहरूलाई प्रदान गर्दै आएको बिक्री तथा सेवाहरूमा सुधार गर्दै अझै व्यापक बनाउन केन्द्रित रहनुका साथै पार्टनरहरूबीचको आपसी सम्बन्धलाई प्रगाढ बनाउने सम्मेलनको मुख्य उद्देश्य रहेको थियो ।

कार्यक्रममा कम्पनीलाई नयाँ उचाईमा पुर्याउन पार्टनरहरूको मेहेनत र योगदानलाई सम्मान गर्दै कम्पनीका आगामी रणनीति र भावी योजनाबारे छलफल गरिएको थियो ।

सोहि अवसरमा कम्पनीका ब्राण्ड एम्बेसेडर राजेश हमालले लुम्बिनी विद्युत उद्योगको पनि भ्रमण गरेका थिए । भ्रमणको दौरान कम्पनीले प्रयोग गर्दै आइरहेको एडभान्स जर्मन टेक्नोलोजी मेसिनबाट उत्पादित सामानहरू अवलोकन गरेका थिए ।

प्रकाशित समय : ००:४९ बजे