व्यवसाय सञ्चालन गर्न बैंक तथा वित्तीय संस्थाबाट सस्तो ब्याजदरमा एक करोड रुपैयाँसम्मको कर्जा पाइने भएको छ । कृषि, हस्तकला तथा सीपमूलक व्यवसाय एवं उद्यम व्यवसायमा एक करोड रुपैयाँभन्दा कम रकमको कर्जा आधार दरमा बढीमा २ प्रतिशत मात्र थपेर दिनुपर्ने राष्ट्र बैंकले निर्देशन गरेको छ ।

एकीकृत निर्देशन २०७८ मार्फत राष्ट्र बैंकले यस्तो व्यवस्था गरेको हो । गत आर्थिक वर्षमा १५ लाख रुपैयाँसम्मको यस्तो कर्जा मात्र सस्तो दरमा प्रवाह गर्नुपर्ने निर्देशन थियो । चालु आर्थिक वर्षमा कर्जाको सीमा बढाएर एक करोड रुपैयाँ पुर्‍याएको हो ।

आधार दर बैंक तथा वित्तीय संस्थाले कर्जाको ब्याजदर निर्धारण गर्ने प्रमुख आधार (बेस रेट) हो । स्रोत व्यवस्थापन (निक्षेप संकलन तथा व्यवस्थापन) गर्दा लाग्ने लागत जोडेर आधार दर निकालिन्छ । यही दरमा प्रिमियम थप गरेर बैंकहरूले कर्जाको ब्याजदर तोक्छन् ।

अहिले राष्ट्र बैंकले उल्लिखित शीर्षकमा तोकिएको सीमासम्म कर्जा प्रवाह गर्न आधार दरमा २ प्रतिशतसम्म मात्र थप गर्न पाउने सुविधा बैंक तथा वित्तीय संस्थालाई दिएको हो ।

प्रकाशित समय : १३:४० बजे