प्रधानन्यायाधीश चोलेन्द्र शमशेर राणाविरुद्ध कात्तिक १४ देखि आन्दोलन गर्दै आएको नेपाल बार एशोसिएशनले तेस्रो चरणको आन्दोलन सुरु गरेको छ । न्यायालयमा विकृति भित्र्याएको भन्दै राणाको राजीनामा माग गरिरहेको बारले कालोपट्टी बाँधेर सर्वोच्च अदालतमा धर्ना दिँदै आएको थियो । अब तेस्रो चरणको आन्दोलनबाट राजीनामा दिन बाध्य पार्ने बारको भनाई छ ।

अध्यक्ष चण्डेश्वर श्रेष्ठले गोला प्रक्रियाद्वारा पेसी तोक्ने व्यवस्था गरेर प्रधानन्यायाधीशबाट उक्त अधिकार खोसियो भन्दैमा ढुक्क हुने अवस्था नरहेको बताए । उनले भने, ‘अहिले पेसी तोक्न र न्याय सम्पादन गर्नबाट प्रधानन्यायाधीशलाई हटाउन खोजिएको छ । तर बिचौलियालाई पाल्ने, न्याय परिषद्‍बाट न्यायाधीशहरूलाई सरुवा गर्ने र काजमा पठाउने अधिकार उनैलाई छ,’ उनले भने, ‘त्यो नखोसेसम्म प्रधानन्यायाधीश ढुक्क भएर बस्छन् । उनले खाने तरिका अर्को छँदैछ । त्यो रोक्नका लागि न्याय प्रशासनको अधिकार पनि खोस्नुपर्छ । गोला प्रणालीको आधारबाट उनको दाह्रा, नंग्रा त झिकियो तर चपाउने दाँत बाँकी नै छन् ।’ 

कानुन व्यवसायीहरुले गृहमन्त्री बालकृष्ण खाणको समेत राजीनामा माग गरेका छन् । सर्वोच्च अदालत परिसरभित्र शान्तिपूर्ण धर्ना कार्यक्रममा अवरोध गर्न सशस्त्र र दंगा प्रहरी परिचालन गरेको भन्दै उनीहरूले गृहमन्त्री खाँणको राजीनामा माग गरेका हुन् ।

नेपाल बारले सोमबार देशभरिका अदालतमा १० देखि १२ बजेसम्म कालोपट्टीसहित धर्ना, विरोधसभा गर्ने यसअघिको कार्यक्रमलाई निरन्तरता दिने जनाएको छ । सोमबार नै संघीय संसद्मा रहेका सबै राजनीतिक दलका संसदीय दलहरूमा ज्ञापनपत्र बुझाउने कार्यक्रम छ । 

प्रकाशित समय : १३:२६ बजे