सांग्रिला डेभलपमेन्ट बैंक लिमिटेडले शनिबार आफ्नो १७औं वार्षिकोत्सव मनाई साताव्यापी कार्यक्रमको समापन गरेको छ । बैंकले १७औं वार्षिकोत्सवको अवसर पारेर देशभर साताव्यापी कार्यक्रम सार्वजनिक गरेसँगै शनिबार विभिन्न कार्यक्रम गरी मनाएको हो ।

बैंकको उक्त वार्षिकोत्सव कार्यक्रममा बैंकका सञ्चालक समितिका अध्यक्ष तथा सञ्चालकहरु, प्रमुख कार्यकारी अधिकृत तथा अन्य कर्मचारीहरुको उपस्थिति रहेको थियो । बैंकले शनिबार नै १००औं शाखाको रुपमा सुर्खेतस्थित यारीचोकमा शाखा कार्यालय सञ्चालनमा ल्याएको छ । त्यस्तै बैंकले संस्थागत सामाजिक उत्तरदायित्व वहन गर्ने सन्दर्भमा गैर सरकारी संस्था इ-नेवल नेपाललाई कृत्रिम अंग वितरणका लागि बैंकका प्रमुख कार्यकारी अधिकृत सुयोग श्रेष्ठले २ लाखको चेक हस्तान्तरण गरेका थिए । 

सांग्रिला डेभलमपेन्ट बैंकको प्रांगणमा सम्पन्न १७औं वार्षिकोत्सवको अवसरमा बैंकमा १० वर्ष पूरा गरेका कर्मचारीहरुलाई सम्मान गरी कदरपत्र तथा तक्मा प्रदान गरिएको थियो । बैंकले वार्षिकउत्सवको अवसर पारेर शनिबार नै देशभित्रै एक ठाउँबाट अर्को ठाउँमा सरल र सहज रुपमा रकम स्थानान्तरण गर्ने सुविधाको लागि सांग्रिला रेमिटको नामबाट आन्तरिक विप्रेशण सेवासमेत सञ्चालनमा ल्याएको छ ।