तालिबानले अफगानिस्तानको दोस्रो ठूलो सहर कान्धारमाथि पनि कब्जा गरेको दाबी गरेको छ । यो तालिबानका लागि एक महत्वपूर्ण जीत भएको बीबीसीले जनाएको छ । यो सहर कुनै समय तालिबानको गढ थियो ।

कान्धार एक प्रमुख व्यापार केन्द्र र  रणनीतिक रूपमा महत्वपूर्ण रहेको क्षेत्र हो । बिहीबार कयौं सहरमा तालिबानले नाटकीय जीत हात पारेको जनाइएको छ । संयुक्त राज्य अमेरिकाले अफगानिस्तानस्थित अमेरिकी दूतावासका कर्मचारी निकाल्न सहयोग गर्नका लागि करिब ३ हजार सैनिकलाई अफगानिस्तान पठाउने जनाएको छ । विशेष उडानमा दूतावासका कर्मचारीको एक 'महत्वपूर्ण' संख्या निकाल्नका लागि मद्दत गर्न काबुलस्थित विमानस्थलमा सैनिकलाई पठाउन लागेको अमेरिकाले जनाएको हो ।

अमेरिका र अन्य विदेशी सैनिक २० वर्षको सैन्य अभियानपछि फिर्ता भएसँगै तालिबानी तीव्र रुपमा अघि बढिरहेका छन् र उनीहरुले नयाँ नयाँ क्षेत्रमा कब्जा गरिरहेका छन् । बिहीबार केही घन्टाभित्र तालिबानले अफगानिस्तानको सबैभन्दा महत्वपूर्ण सहमा कब्जा गरेको छ । हेरात, गजनी र काला-ए-नवा तालिबानको नियन्त्रणमा आएको छ ।

तालिबानका प्रवक्ताले घोषणा गरेका छन्, 'कान्धार पूर्ण रुपमा जितिएको छ ।' तर यसको  स्वतन्त्र  पुष्टि भएको नभएको बीबीसीले जनाएको छ ।