सरकारले नेपाल एयरलाइन्ससहित चार वायुसेवा कम्पनीलाई तीन अन्तर्राष्ट्रिय गन्तव्यमा नियमित उडानको लागि अनुमति दिएको छ । सरकारकाे निर्णयअनुसार भारतमा दुई र अन्य तीन मुलुकमा साताको एक नियमित उडान हुने भएकाे हाे ।

यसका लागि नेपाल नागरिक उड्डयन प्राधिकरणले उडान तालिका स्वीकृत गरेको छ । तालिकाअनुसार नेपाल वायुसेवा निगम, टर्किस एयरलाइन्स, कतार एयरवेज र एयर इण्डियाले नेपालमा नियमित उडानको अनुमति पाएको हाे । टर्कीले इस्तानबुलमा मात्र उडान गर्न पाउने जनाइएको छ । टर्कीले लागि ३ जुनबाट हरेक बिहीबार साताकाे एक उडानको अनुमति पाएकाे हो । यस्तै नेपाल एयरलाइन्सले कतारको दोहा र भारतको नयाँ दिल्लीका लागि अनुमति पाएको छ । दोहाका लागि कतार एयरवेजले समेत एक उडान गर्नेछ । दुवै कम्पनीले ७ जुनबाट उडान थाल्न सक्नेछन् ।

नेपाल एयरलाइन्सको जहाज हरेक बुधबार नयाँ दिल्ली उड्ने भएको छ । भारतीय वायुसेवा एयर इण्डियाले भने साताको शुक्रबार काठमाडौ उडान गर्ने गरि अनुमति पाएको छ । नियमित उडान खुलेकामध्ये चीनमा भने कुनै पनि वायुसेवा कम्पनीले नियिमत उडानको प्रस्ताव पेश गरेका छैनन् ।