सीमा क्षेत्रमा हुने आपराधिक गतिविधि नियन्त्रण गर्न र सीमा सुरक्षालाई बलियो बनाउने उद्देश्यले झापामा आइतबार एकै दिन पाँचवटा सशस्त्र प्रहरीको बोडर आउट पोस्ट (बीओपी) उद्घाटन गरिएको छ ।  पाँचवटै बीओपीको मेचीनगर नगरपालिका- ५ स्थित नकबलबन्दामा मेचीनगर नगरपालिकाका प्रमुख विमल आचार्य र सशस्त्र प्रहरी बल नं १ बराहवाहिनी पकलीका वाहिनीपति सशस्त्र प्रहरी नायब महानिरीक्षक (डीआइजी) वंशीराज दाहालले संयुक्त रुपमा उद्घाटन गरेका हुन् ।

मेचीनगर- १ स्थित तिरिङ, भद्रपुर- ३ स्थित महेशपुर, झापा गाउँपालिकाको पन्थापाडा र गौरीगञ्जको आमगाछीमा स्थापना गरिएका बीओपीको एकै ठाउँबाट उद्घाटन गरिएको हो । यीसँगै जिल्लामा बीओपीको संख्या १७ पुगेको छ । एउटा बीओपीमा इन्स्पेक्टरको कमान्डमा २५ जना सुरक्षाकर्मी रहने व्यवस्था मिलाइएको डीआइजी दाहालले बताए । 

यसअघि झापाको बाहुनडाँगी, काँकरभिट्टा, ज्यामिरगढी, पाठामारी, केचना, भागडुब्बा, टाघनडुब्बा, गौैरीगञ्ज, घेरावारी कुञ्जिवारी  भद्रपुर  र पृथ्वीनगर गरी कुल १२ वटा सशस्त्र प्रहरीको बीओपी स्थापना गरी सकिएको छ । उनले सीमा सुरक्षा र सीमा क्षेत्रमा हुने आपराधिक गतिविधि न्यूनीकरणका लागि जिल्लामा चार किलोमिटरको अन्तरमा ३७ वटा बीओपी स्थापना गर्ने सरकारको लक्ष्यअनुसार १७ वटा भइसकेको र बाँकी २० वटा निर्माणका लागि जग्गाको पहिचान भइसकेको जानकारी दिए । 

नगरप्रमुख आचार्य र उपप्रमुख मीना उप्रेतीले चौकी स्थापना भएसँगै सीमा क्षेत्रमा हुने अवाञ्छित गतिविधि नियन्त्रण, सीमाको सुरक्षा र अवैध चोरी तस्करी नियन्त्रणमा सहयोग पुग्ने विश्वास व्यक्त गरे । उनीहरुले बिओपीमा आवश्यक पर्ने भौतिक तथा अन्य संरचना निर्माणमा नगरले आर्थिक सहयोग गर्ने बताए ।

झापाका प्रमुख जिल्ला अधिकारी श्रवणकुमार तिम्सिनाले झापाको १४४ दशमलव दुई किलोमिटर क्षेत्रफलमा भारतसँगको खुला सीमा रहेकाले हातहतियार, लागुऔषध, मानव बेचबिखनलगायत आपराधिक गतिविधि न्यूनीकरण हुने, सीमाको उचित रेखदेख  र राष्ट्रिय सुरक्षालाई मजबुत पार्ने काममा बीओपीहरुको महत्वपूर्ण योगदान रहने बताए । सीमा सुरक्षालाई ध्यानमा राखी संघीय सरकारले २०७६ मंसिर ३० गते नै देशभरिमा ११४ वटा बीओपी थप्ने निर्णय गरेको थियो । सोहीअनुरुप नै जिल्लामा कार्य भइरहेको सशस्त्र प्रहरी बल नेपाल नं २ गण हेटक्वार्टर चन्द्रगढीका  एसपी रमेशकुमार पाण्डेले जानकारी दिए ।

प्रकाशित समय : २३:४० बजे