बढ्दो सहरीकरणसँगै अव्यवस्थित बसोबास बढ्दो छ । बढ्दो प्लटिङले बस्ती कुरूप देखिनुका साथै विद्युत् र खानेपानी आपूर्ति राम्ररी नपुगेको देख्दा भीमसेन आदर्श उच्च माविका विद्यार्थीमा आफ्नो गाउँघर कसरी व्यवस्थित गराउन सकिन्छ होला भन्ने सोच आयो ।

दुई/चार जना साथी मिलेर आफ्नो गाउँमा खेलमैदान, खानेपानी टयांकी, पार्कसहितको योजना बनाएर राखे । यो योजनालाई पनि धेरैले मन पराए ।

गत बिहीबारदेखि रजहरमा सुरु विज्ञान प्रदर्शनीमा १८ विद्यालयका विद्यार्थीले सहभागिता जनाएका छन् । प्रदर्शनीमा बालबालिकाको कला र प्रविधिप्रतिको चासो देखेर अभिभावक र सरोकारवाला दङ्ग परे । विद्यार्थी आफैंले पहिलो पटक विज्ञान प्रदर्शनी आयोजना गरेको विद्यालयका प्राचार्य नारायण भण्डारीले बताए ।

प्रदर्शनीमा जिल्लाका कक्षा ९ देखि १२ सम्मका विद्यार्थीले बनाएका विभिन्न प्रविधि राखिएका थिए ।