नेपाली कांग्रेसको शुभेच्छुक संस्था नेपाल ट्रेड युनियन कांग्रेसका नवनिर्वाचित अध्यक्ष पुष्कर आचार्यले आफ्नो मुख्य कार्यभार कम्युनिस्ट सर्वसत्तावाद रोक्ने र पार्टी सुदृढीकरण गर्ने रहेको बताएका छन् ।
राज्यका कुनै पनि अंगमा आफ्नो उपस्थिति रहने र शून्य अवस्थामा पुगेको पार्टी सदृढीकरणमा जोड दिने उनको भनाइ छ । ‘हाम्रो संगठन कमजोर भएको छ । त्यसलाई मजबुत बनाउनुपर्नेछ । त्यसका लागि संगठनको दायरा बढाउन जरुरी छ,” न्युजकारोबारसँग आचार्यले भने । कर्मचारीलाई आर्थिक रुपमा बलियो बनाउन भूमिका निर्वाह गर्ने उनले बताए ।
आचार्य वरिष्ठ नेता रामचन्द्र पौडेल पक्षका हुन् । गुट–उपगुटले गाँजिएको कांग्रेसको ट्रेड युनियनमा निर्वाचित आचार्यलाई काम गर्न त्यति सहज भने हुने छैन । सभापति शेरबहादुर देउवा पक्षले उनलाई अफ्ठ्यारो पार्ने रणनीति लिनसक्छ । तर, आचार्यले भने त्यसो हुन नदिने दाबी गरे । ‘अन्तरविरोध व्यक्तिसँग हुन्छ तर संगठनको हितका लागि कदापि अन्तरविरोध हुँदैन र हुन दिँदैनौं,’ उनले भने ।
केन्द्रदेखि प्रदेश सरकार कहीँ पनि कांग्रेसले नेतृत्व नपाउँदा र स्थानीय सरकारमा पनि न्यून उपस्थिति हुँदा कम्युनिस्ट सर्वसत्तावादको खतरा रहेको भन्दै नवनिर्वाचित अध्यक्ष आचार्यले त्यसतर्फ जनतालाई सजग गराउने बताए । ‘अहिले मुलुक छुट्टै ढंगले हिँड्न थालेको छ । कम्युनिस्टलाई घमण्ड र दम्भले छपक्कै छोपेकाले जे पनि गर्न सक्छन्,’ उनले भने, ‘मुलुकलाई विधिअनुरुप चलाउन पनि सिकाउनुपने छ । त्यसतर्फ हाम्रो ध्यान विशेष रहन्छ ।’
आचार्यले कम्युनिस्टहरुले एकजुट भएर जनताको नाममा एकतन्त्रीय शासन लाद्न खोजेको आरोप लगाए । संविधानबाट पाएको अधिकार र संसदबाट कानुन बनाएर लिएको अधिकार खोसिने डर कांग्रेसलाई रहेको उनले बताए ।