कोमल वलीले भनिन्– बजेटमा सरकारले मनपरि गरेन, मितव्ययी बन्यो
वि.सं.२०७५ जेठ १८ शुक्रवार १९:४५
shares

काठमाडौं– सांसद कोमल वलीले स्थानीय जनप्रतिनिधिबिना आफू केन्द्रमा आइपुग्न नसकेको भन्दै उनीहरुको उच्च सम्मान गरेकी छन् । ‘स्थानीय जनप्रतिनिधि मेरा गोडा हुन्, जसको भरमा म हिँडिरहेको छु,’ आगामी आर्थिक वर्षको बजेटमाथिको छलफलका क्रममा राष्ट्रियसभा उनले भनिन्, ‘मुलुक संघीयतामा गइसकेको र स्थानीय जनप्रतिनिधि त्यसको जग भएकाले म उनीहरुलाई उच्च सम्मान गर्छु ।’ केही सांसदहरुले स्थानीय जनप्रतिनिधिलाई उपेक्षा गरेको प्रति कटाक्ष गर्दै उनले भनिन्, ‘जनप्रतिनिधिसँग मिलेर आयोजना छनोट गर्ने र विकास गर्ने सुविधा बजेटले दिएको छ, त्यसको उपयोग गर्नुपर्छ, विरोध होइन ।’
शक्तिशाली र पूर्णबहुमतप्राप्त सरकारसँग जे पनि गर्न सक्ने छुट हुँदाहुँदै मितव्ययी ढंगले बजेट विनियोजन भएको भन्दै उनले अर्थमन्त्री र सरकारको प्रशंसा गरिन् । ‘जसलाई, जसरी र जति पनि बाँड्न सक्थ्यो सरकारले,’ उनले भनिन्, ‘तर गरेन, मितव्ययिता अपनायो, हो यही नै हो यो सरकारको विशेषता ।’

























