कप्तान ह्यारी केनले खेलको अन्त्यतिर निर्णायक गोल गरेपछि इंग्ल्यान्डले २०१८ फिफा विश्वकपमा विजयी सुरुवात गरेको छ । इंग्ल्यान्डले समूह जीको खेलमा ट्युनिसियालाई २–१ गोलले पराजित गरेको हो ।
खेलको ११ मिनेटमा केनले गोल गर्दै इंग्ल्यान्डलाई अग्रता दिलाएका थिए । उनले क्लोज रेन्जबाट बललाई जाली चुमाएका थिए । तर, ३५ मिनेटमा ट्युनिसियाले बराबरी गोल फर्काउन सफल भयो । ट्युनिसियाका सासीले पेनाल्टीमा गोल गरेका थिए । केल वल्करले बेन युसुफलाई डिबक्सभित्र फल गरेपछि ट्युनिसयाले पेनाल्टी अवसर पाएको थियो ।
दोस्रो इन्जुरी टाइमको पहिलो मिनेटमा केनले व्यक्तिगत दोस्रो गोल गर्दा इंग्ल्यान्डले रोमाञ्चक जित हात पर्न सफल भयो । कप्तान केनले क्लोज रेन्जबाट गरेको हेडले सिधै गोलपोस्टको दिशा लिएको थियो ।

बेल्जियमले पानामालाई तीन गोलले हरायो

यो समूहको अर्को खेलमा बेल्जियमले पानामालाई ३–० गोलले पराजित गरेको थियो । २०१८ फिफा विश्वकपमा बेल्जियमले उत्कृष्ट सुरुवात गरेको हो । पहिलो हाफमा भने नवप्रवेशी पानामाले स्टार खेलाडीले भरिएको बेल्जियमलाई गोलरहित बराबरीमा समेटेको थियो ।
डिफेन्सिभ खेल खेलिरहेको पानामाले दोस्रो हाफ सुरु भएलगत्तै बेल्जियमको कडा समाना गर्नुप¥यो । पानामाको खेल स्ट्राटेजी बुझेको बेल्जियमलका मार्टिन्सले ४७ मिनेटमा गोल गर्दै बेल्जियमलाई अग्रता दिलाए ।
रोमेलु लुकाकुले ६९ मिनेटमा बेल्जियमको अग्रता दोब्बर पारे । उनले क्रस बलमा हेडमार्फत गोल गरेका थिए । ७५ मिनेटमा लुकाकुले व्यक्तिगत दोस्रो गोल गर्दा बेल्जियम ३–० गोलले अघि बढेको थियो ।
पहिलो हाफमा बेल्जियम असफल भएपछि दोस्रो हाफको सुरुवातदेखि उत्कृष्ट लयमा देखियो । केभिन डे ब्रुइनले दोस्रो गोलका लागि लुकाकुलाई पास मिलाएका थिए । यस्तै तेस्रो गोलका लागि इडिन हजार्डले पास मिलाए ।

प्रकाशित समय : १४:०३ बजे