मध्यपश्चिमाञ्चल विश्वविद्यालय सुर्खेतमा अनसन बसेका विद्यार्थीको स्वास्थ्य अवस्था बिग्रिँदै गएको छ । विश्वविद्यालयले शान्तिपूर्ण आन्दोलनलाई बेवास्ता गरेको भन्दै बुधबारदेखि आमरण अनसनमा बसेका विद्यार्थीको स्वास्थ्य अवस्था बिग्रिँदै गएको हो ।

विभिन्न माग राख्दै इन्जिनियरिङ संकायका विद्यार्थीले असार ५ गतेदेखि आन्दोलन गरेका थिए । शान्तिपूर्ण आन्दोलन गर्दा समेत विश्वविद्यालयका पदाधिकारीले कुनै चासो नदेखाएको भन्दै तीनजना विद्यार्थी अनसन बसेका हुन् ।

मध्यपश्चिमाञ्चल विश्वविद्यालयको अान्दोलन

विद्यार्थी रोशन बस्नेत, मिलन विसी र रत्न शर्मा अनसनमा बसेका छन् भने अन्य विद्यार्थी सडक आन्दोलनमा उत्रिएका छन् । अनसन बसेका विद्यार्थीको स्वास्थ्य गम्भीर भइरहँदा विश्वविद्यालय प्रशासन भने रमिते बनेको छ ।

विद्यालयमा निरन्तर पठनपाठन र प्रशासनिक काम निरन्तर अगाडि बढेको छ भने विद्यार्थीको माग पूरा गर्न विश्वविद्यालयका पदाधिकारीले कुनै चासो देखाएका छैनन् । अनसनमा बसेका विद्यार्थीको स्वास्थ्य अवस्था गम्भीर बन्दै गएको विद्यार्थी निकुञ्ज पाण्डेले बताएका छन् ।

माग पूरा नभएसम्म अनसन नतोड्ने अडान विद्यार्थी छन् । माग पूरा नभए जायज मागका पक्षमा सम्पूर्ण अभिभावक सडकमा उतार्ने चेतावनी आन्दोलनरत विद्यार्थीले दिएका छन् । २०६७ सालमा स्थापना भएको मध्यपश्चिमाञ्चल विश्वविद्यालय सुर्खेतमा विभिन्न माग राख्दै विद्यार्थी सधैं आन्दोलनमा हुने गरेका छन् ।

विद्यार्थीहरू इन्जिनियरिङ संकायलाई पूर्ण स्वायत्त बनाइनुपर्ने, गोल्डेन चान्स परीक्षाको व्यवस्था गरिनुपर्ने, सम्पूर्ण प्रयोगात्मक परीक्षा पूर्णरुपमा सञ्चालनमा ल्याउनुपर्नेलगायतका माग राख्दै अान्दोलनमा उत्रिएका हुन् ।

प्रकाशित समय : ०२:४९ बजे