कर्णाली प्रदेशको राजधानी सुर्खेतमा निर्वाचन आयोगले सञ्चालन गरेको प्रदेश स्तरिय समिक्षा कार्यक्रमबाट १३ बुदें सुझाब अनुमोदन भएको छ । उक्त कार्यक्रम स्थानिय तह, प्रदेश सभा, प्रतिनिधि सभा, राष्ट्रिय सभा एवं राष्ट्रपति तथा उपराष्ट्रपतिको निर्वाचनको समीक्षा गर्न दुईदिन सम्म चलेको थियो ।

निर्वाचन आयोगले आयोजना गरेको समिक्षा कार्यक्रमका सहभागीहरुले दिएको महत्वपुर्ण सुझाबहरु अनुमोदन भएका छन् । मतदाता नामावलीको सम्बन्धमा फोटोसहितको मतदाता नामावली वेवसाईटमा हेर्न सकिने व्यवस्था, परिचयपत्रको व्यवस्था जस्ता राम्रा पक्षहरु रहेको सहभागीहरुले बताएका थिए । यद्यपि विवरणमा त्रुटि, दर्तास्थलको सीमित स्थान जस्ता समस्याहरु रहेकोले अगाामी दिनमा शुद्ध बनाउने र स्थायी परिचयपत्र उपलब्ध बनाउने सुझाब समिक्षा कार्यक्रमबाट अनुमोदन भएको छ ।

त्यसैगरी सुचना प्रविधिको प्रयोगको अभ्यास सराहनीय भएको भन्दै सहभागीहरुले आयोगको प्रशंसा गरेका थिए । तथापी यो सहज, प्रभावकारी र सर्वसुलभ हुन नसकेकोले यसलाई पहुँचयोग्य र विश्वसनिय बनाउनुपर्ने, मतादाता शिक्षामा प्रयोग गरिएका माध्यमहरुलाई व्यवस्थित र दिगो हुन नसकेकोले निरन्तररुपमा सबै सरोकारवालालाई मध्यनजर गर्नुपर्नेमा सहभागीहरुले जोड दिएका थिए ।

समीक्षाबाट मतदाता शिक्षालाई प्रभावकारी बनाउनुपर्ने, निर्वाचन आचारसंहितामा कडाई गर्नुपर्ने, जस्ता सुझाबसमेत अनुमोदन भएका छन् । जनशक्ति परिचालनमा महिलाको संख्या तुलनात्मक रुपमा कम रहेको भन्दै त्यसलाई बढाउनुपर्ने सुझाब समेत आएको छ । सामग्री ढुवानी, मतदानस्थलका समस्या जस्ता विषयहरु समेतमा सहभागीहरुले समीक्षा गरेका थिए । त्यसैगरी मतदानस्थलमा नै मतगणना गर्ने व्यवस्था मिलाउने सुझाब समेत अनुमोदन भएको छ ।

साथै निर्वाचन खर्चको प्रकृति तथा प्रवृत्तिको विकृत स्वरुपलाई मध्यनजर राख्दै कानुनी र व्यवहारिक रुपमा खर्च नियन्त्रण, नियमन र व्यवस्थापन गरी दल र उम्मेदवारलाई जिम्मेवार बनाउन कानुनी व्यवस्था हुनुपर्ने सुझाब समेत अनुमोदन भएको छ । त्यसैगरी उम्मेदवारी दिने र लिने राजनितिक दलको विकृत अभ्यासलाई नियमन र व्यवस्थापन गर्नुपर्ने, निर्वाचन विवादलाई सहज र छिटो संयन्त्र मार्फत् निरुपण गर्ने र विवादका विषयहरुलाई कानुनमा नै प्रष्ट र प्रभावकारी बनाउनुपर्ने लगाएतका सुझाब अनुमोदन भएको छ ।

निर्वाचनको मिति तोक्ने कार्य र निर्वाचन क्यालेन्डर तयार गरी निर्वाचन गराउन आयोगलाई जिम्मेवार बनाउने गरी कानुनी व्यवस्था गरिनुपर्ने, मतदानस्थललाई व्यवस्थित र दिगो बनाउनका लागी सामूहिक रुपमा पुनराबलोकन गर्ने र निर्वाचन सरोकारवालाहरुको पहिचान गरी प्रशिक्षण कार्यक्रमको तह र दायरा बढाई नियमित प्रक्रियाको रुपमा संञ्चालन गर्ने जस्ता सुझाब निर्वाचन आयोगको समिक्षा कार्यक्रमबाट अनुमोेदन गरिएको छ ।

समिक्षा कार्यक्रमको समापन कार्यक्रममा बोल्दै निर्वाचन आयोगका आयुक्त सुधिर शाहले देशभरी विभिन्न ठांउमा समिक्षा कार्यक्रम हुने र सबै ठाँउबाट आएका सुझाबलाई सम्बोधन गरी अगामी दिनमा निर्वाचनलाई स्वच्छ, निश्पक्ष र धाँधलीरहित बनाउनमा सहयोग पुग्ने बताएका छन् । कर्णाली प्रदेशको समीक्षा कार्यक्रमबाट अनुमोदन गरिएका सुझाबहरु  समेत महत्वपुर्ण भएको आयुक्त शाहको भनाई थियो  ।