प्रधानमन्त्री केपी शर्मा ओलीले शुत्रबार मन्त्रिपरिषद् विस्तार गरेका छन् । उनले शेरबहादुर तामाङले राजिनामा दिएपछि रिक्त रहेको कानुन, न्याय तथा संसदीय मामिला मन्त्रालयको जिम्मेवारी भानुभक्त ढकाललाई दिएका छन् ।

कानुन मन्त्री बनेका ढकाल नेपाल कम्युनिस्ट पार्टी (नेकपा)का सांसद हुन् । उनी मोरङको क्षेत्र नम्बर ३ बाट निर्वाचित भएका थिए । बंगलादेशमा अध्ययनरत छात्राको विषयमा अभिव्यक्ति दिएका तामाङले सोही विवादका कारण मन्त्री पदबाट राजिनामा दिएका थिए । उनको राजिनामा पछि ढकाललाई कानुन मन्त्री बनाइएको हो ।

त्यसैगरी स्वास्थ्य तथा जनसंख्या राज्यमन्त्रीको जिम्मेवारीमा रहेकी पदमा अर्याललाई प्रधानमन्त्री ओलीले भूमि व्यवस्था तथा गरिबी निवारण मन्त्रीको जिम्मेवारी दिएका छन् । ओली सरकारमा राज्यमन्त्रीबाट मन्त्रीमा बढुवा हुने अर्याल दोस्रो हुन् । यसअघि गोकुल बाँस्कोटालाई पनि राज्यमन्त्रीबाट मन्त्री बनाइएको थियो ।

त्यसैगरी प्रधानमन्त्री ओलीले स्वास्थ्य तथा जनसंख्या राज्यमन्त्रीमा डा. सुरेन्द्र यादवलाई नियुक्त गरेका छन् । नवनियुक्त तीन मन्त्रीको शुक्रबार नै सपथ हुने कार्यक्रम रहेको छ ।

सरकार गठन भएलगत्तै स्वास्थ्य तथा जनसंख्या मन्त्रालयको राज्यमन्त्रीमा पदमा अर्याललाई नियुक्त गरिएको थियो । तर सरकार विस्तारका क्रममा स्वास्थ्य मन्त्रालय संघीय समाजवादी फोरमको भागमा परेको थियो । जसबाट फोरमका नेता मन्त्री एवं नेकपाका नेता राज्यमन्त्री बनेका थिए ।

त्यसको केही समयपछि सरकारले पदमा अर्यालको व्यवस्थापनका लागि कृषि मन्त्रालय फुटाएका थिए । कृषि मन्त्रालयमा पनि नेकपाकै चन्द्रप्रकाश खनाल मन्त्री छन् । कृषि मन्त्रालय फुटाएर बनाइएको भूमि व्यवस्था तथा गरिबी निवारण मन्त्रालयको जिम्मा अर्यालले पाएकी हुन् ।