कैलालीको गोदावरी नगरपालिका–९ धनचौरीकी ४० बर्षीया तारा जोशीले ११ महिने छोरी डम्बराको हत्या गरेको आशंका गरिएको छ । सासु सुनमती जोशीले दिएको जानकारी अनुसार मंगलबार राती सँगै सुताएकी छोरी आज बिहान मृत अवस्थामा भेटिएकी छन् ।

सोही घरमा ताराले आफ्नो सन्तान मारेको यो तेस्रो घट्ना भएको उनका आफन्तले दाबी गरेका छन् । सुनमतीले आफू र आफ्नो श्रीमान काठमाडौँ भएको बेला घरमा नातिनिको हत्या भएको बताइन् ।
ताराले दुई बर्ष पहिले एक महिनाको छोरा र चार बर्ष पहिले १० दिनको छोरालाई पनि घाँटी च्यापेर मारेको सासु सुनमतीको भनाइ छ । ताराका श्रीमान हर्क जोशी सुस्त मनस्थितिका रहेको बुझिएको छ । उनीहरुको पाँच बर्षको छोरा भने आफूसँगै राखेकाले जोगिएको सुनमतीले बताइन् ।

तारा निकै रिसालु र झगडालु स्वभावकी रहेको परिवारका सदस्यले बताएका छन् । आफन्तले प्रहरीलाई खबर गरेपछि प्रहरी घट्नास्थलमा पुगेको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक हरिबहादुर वलीले जानकारी दिए । अत्तरीयाबाट गएको प्रहरीको टोली खुटिया नदीमा पानी बढेकाले जान नसकेपछि पुनः धनगढी भएर गएको उनले बताए । घट्नाबारे प्रहरी घट्नास्थल पुगेपछि मात्रै थाहा हुने वलीले बताए ।