परराष्ट्रविद डा. दिनेश भट्टराईले सरकारलाई हठ छाडेर विनम्रता देखाउन आग्रह गरेका छन् । आफूलाइ यातना दिएर सत्यका लागि आग्रह गरिरहेका डा. गोविन्द केसीको माग जनताकै माग भएको भन्दै उनले विनम्रता देखाउन सरकारलाई आग्रह गरेका हुन् ।

बुटवलमा बुधबार आयोजित कार्यक्रममा परराष्ट्रविद भट्टराईले तत्कालीन कोइराला सरकारले आवश्यक ठानेरै माथेमा टोलीलाई प्रतिवेदन बनाउन लगाएको उल्लेख गरे । ‘विज्ञको प्रतिवेदनलाई लाइन बाई लाइन छलफल गरेर निष्कर्षमा पुग्न जरुरी छ,’ उनले भने, ‘डा. केसीको अभियान एक्लो प्रयास होइन, नागरिक समाज र आमनेपाली जनताको समर्थनको विषय हो ।’

दुई तिहाइ जनमत भएको सरकारले पनि आत्मविश्वास नभएको जस्तै व्यवहार प्रदर्शन गरिरहेको उनले बताए । नेपालमा दक्षिण एसियामै सबैभन्दा बढी निजी मेडिकल कलेज भएकाले अब यसलाई व्यवस्थित गर्नुपर्ने भट्टराईको भनाइ छ ।

प्रदेश ५ का प्रदेशसभा सांसद विष्णु पन्थीले मुलुकको निकासका लागि दलहरुले साझा धारणा बनाउनुपर्ने बताए । ‘सरकारले रेगुलेट गर्ने हो, निश्चित प्रक्रिया पुर्याएर सञ्चालन गर्न दिने हो भने यो समस्या टुंगिन्छ,’ उनले भने ।

प्रकाशित समय : २१:४५ बजे