म्याग्दीस्थित रघुगंगा गाउँपालिका–२ भगवतीको रुइसेस्थित थामकोटलाई पर्यटकीय स्थलको रुपमा विकास गर्न भ्यु टावर निर्माण शुरु भएको छ । रघुगंगा गाउँपालिका, वडा कार्यालय र भगवतीका बासिन्दाले भ्यु टावर निर्माण शुरु गरेका हुन् ।

धौलागिरि आइसफल पदमार्गको प्रवेशद्वारको रुपमा रहेको रुइसे भेडिओडार क्षेत्रमा पर्यटक भित्र्याउँन भ्यु टावर निर्माण शुरु गरिएको वडा अध्यक्ष रिम कटुवालले जानकारी दिए । गाउँपालिकाले विनियोजन गरेको १५ लाख रुपैयाँ बजेटबाट स्थानीयवासीले श्रमदान गरेर भ्यु टावर निर्माण सुरु गरेका हुन् ।

२७ फिट अग्लो रहने भ्यु टावर तीन तलाको हुनेछ । यस वर्ष पहिलो तलासम्म मात्र बन्ने टावरमा आगामी वर्ष दुई तला थप गर्न बजेटको प्रस्ताव गरिएको छ । थामकोटको निर्माणाधीन भ्यु टावर नजिकै वनभोज स्थलका लागि एउटा टहरा निर्माण भइसकेको छ । उक्त स्थानमा सामुदायिक विश्रामगृह सञ्चालन गर्ने योजना गाउँपालिकाको छ ।

दुई हजार २०८ मिटर उचाइमा अवस्थित थामकोटबाट रघुगंगा गाउँपालिकाका आठ वटै वडा, बेनी नगरपालिका, अन्नपूर्ण, जलजला र बागलुङ नगरपालिकाका भूभाग, सूर्योदय, हिमशृङखलाको अवलोकन गर्न सकिन्छ । हाल वनभोज खान पर्वत, कास्की पुग्ने बेनीका बासिन्दालाई थामकोटमा पुयाउने योजना रहेको छ । समथर खाली भूभाग वनभोज स्थलका लागि उपयुक्त भएको वडा अध्यक्ष कटुवालले जानकारी दिए ।

(रासस)