दुई वर्षअघि स्थापित सेतोट्यामी दुग्ध उद्योगले एक वर्षमा तीन लाख किलो अर्थात् तीन हजार क्विन्टल छुर्पी अमेरिका निर्यात गरेको छ । सेतोट्यामीले कुकुरको आहारा (डगच्यु)का रूपमा नेपालबाट अमेरिका छुर्पी निकासी गरेको हो ।

दैनिक तीन हजार ५०० देखि चार हजार लिटरसम्म दूध संकलन गरेर प्रशोधन गर्ने गरेको यो उद्योगमा प्रतिदिन २५० किलोसम्म छुर्पी र त्यति नै परिमाणमा घ्यु उत्पादन हुन्छ । उद्योगबाट वार्षिक ८० हजार किलो छुर्पी अमेरिका निर्यात हुँदै आएको उद्योगका व्यवस्थापक राजेन्द्रकुमार श्रेष्ठले जानकारी दिए ।

इलाममा रहेका निजी डेरी उद्योगका साथै पाँचथर, ताप्लेजुङ, धनकुटा र तेह्रथुमसमेतका डेरीबाट उत्पादन हुने डगच्यु पनि सेतोट्यामीले संकलन गर्दै आएको छ । ‘इलाम र अन्य चार जिल्लाबाट छुर्पी संकलन गर्छौं,’ उनले भने, ‘हामीले उत्पादन गरेर र खरिद गरेर वार्षिक तीन लाख किलो छुर्पी अमेरिका पठाउँछौँ ।’

सेतोट्यामीले उत्पादन र संकलन गरेको छुर्पी काठमाडौँको मनराम फार्म र मनराम हिमालयन हेन्डिक्राफ्ट हुँदै अमेरिकामा हिमालयन डगच्यु नामक कम्पनीमार्फत बिक्री हुँदै आएको छ । श्रेष्ठका अनुसार यसअघि भने जति डगच्यु निकासी गर्न नसक्दा अमेरिकामै उद्योग खोल्नुपरेको थियो । अहिले काठमाडौँमा पनि उद्योग खोल्ने तयारी भइरहेको उनले जानकारी दिए ।

दुई वर्षअघि १०० लिटर दूध संकलन गरेर सुरू गरिएको उद्योग अहिले १० रोपनी जमिन खरिद गरेर आफ्नै भवनमा कारखाना सञ्चालन गर्दै आएको छ । रोङ गाउँपालिकाको शान्तिपुर, सूर्योदय नगरपालिकाको लक्ष्मीपुर र पशुपतिनगर तथा इलाम नगरपालिकाकै गोदक क्षेत्रमा संकलन हुने चार हजार लिटर दूध यहाँ दैनिक प्रशोधन हुन्छ ।

(रासस)