शुक्रबार दिउँसो पोखराको लागि काठमाडौंबाट छुटेको बस चितवनको इच्छामनकाना गााँउपालिका ३ चुम्लिङटारमा सवा १२ बजे त्रिशूली नदीमा खस्यो । उक्त दुर्घटनामा परि ८ जनाको मृत्यु तथा १६ जना घाइते भएको प्रहरीले जनाएको छ ।

बस दुर्घटनामा १ बालक सहित ८ जनाको मृत्यु भएको चितवनका प्रहरी उपरिक्षक (एसपी) सुशील सिंह राठोरले न्युज कारोबारलाई बताए । बस त्रिशूलीमा खस्दा १६ जना घाईते भएको छन् ।

घाईतेहरुको भरतपुरस्थित पुरानो मेडिकल कलेज, धादिङ र पाेखरामा उपचार भईरहेको राठोरले बताए । घाइते मध्ये ५ जनाको अवस्था गम्भिर रहेको बताइएको छ । गाडीमा ३० जना भन्दा बढी सवार रहेको प्रहरीले अनुमान गरेको छ ।

५ जना मृतकको सनाखत
दुर्घटनामा परि मृत्यु हुनेमध्ये पाँच जनाको सनाखत भएको प्रहरीले जानकारी दिएको छ । प्रहरीका अनुसार पाल्पा वेगनासकालीकाका ३२ वर्षीय अर्जुन न्यौपानेको दुर्घटनामा परि मृत्यु भएको छ । त्यसै गरी सोही दुर्घटनामा परि मृत्यु हुनेमा तनहु भानु नगरपालिका ५ का २७ वर्षीय सुशील श्रेष्ठ, तनहु भन्सारकी २७ वर्षीय कमला श्रेष्ठ, काठमाडौंका ३० वर्षीय रवि गुरुङ तथा तनहु केसबटारका ४० वर्षीय बाबुराम तिवारी रहेका छन् । प्रहरीका अनुसार १ जना बालक र १ पुरुषको सनाखत हुन बाँकी छ ।

यसरी भएको थियो दुर्घटना
काठमाडौंबाट पोखरा जाँदै गरेको ना ६ ख २५०६ नम्बरको गाडी आफ्नो गन्तव्य तिर गई रहेको थियो । आफ्नो गन्तव्यतर्फ गुडीरहेका बसलाई विपरित दिशाबाट आउदै गरेको ना ५ ख ७४०९ नम्बरको ट्रकले ठक्कर दिएको थियो ।

ट्रकले ठक्कर दिए पछि गाडी करीब १०० मिटर तल नदीमा खसेको प्रत्यक्षदर्शीले बताएको छ । ट्रक धोएर सडक छेउमा आउदै गर्दा बससँग ठोकिन पुगेको थियो ।

प्रकाशित समय : २३:२४ बजे