रामेछाप कारागारका प्रमुख नायव सुब्बा प्रमोद आधिकारीले सूचना र विज्ञापन बिना नै आफन्तलाई सरकारी पदमा नियुक्त गरेका छन् । अधिकारीले ड्राइभर र कम्पुटर अपरेटरमा २ जना कर्मचारी करारमा नियुक्ति गरेका हुन् ।

रामेछाप नगरपालिका–८ का अध्यक्ष केदार कार्की र रामेछापका प्रमुख जिल्ला अधिकारी कृष्णप्रसाद शर्माको समेत समर्थनमा कारागारमा कर्मचारी नियुक्त गरेको स्थानीयको आरोप छ । कारागारमा कर्मचारीको अभाव भएपछि गत साउन १५ गते कम्पुटर अपरेटर कमला हायु र ड्राइभर काशीराज दाहाललाई नियुक्त गरिएको प्रमुख जिल्ला अधिकारीले बताए ।

‘मैले एक महिनाको लागि करारमा नियुक्त गरेको हो ।’ अधिकारीले भने, ‘तत्कालको समस्या समाधान गर्न नियुक्त गरिएको हो, प्रशासन कार्यलयमा कुरा भएको र छिट्टै स्थायी कर्मचारी पठाइदिने आश्वसन पाएका छौं ।’ जिल्ला प्रशासनले ढिला गरे विज्ञापन गरेर करारमा नियुक्त गर्ने प्रमुख जिल्ला अधिकारीले बताए ।

नियम अनुसर कर्मचारी राख्ने काम कारागारकै भएकाले नियम विपरित कर्मचारी भर्ना गरिएको भए कारबाही गर्ने उनले चेतावनी दिए । कर्मचारी समायोजन पछि स्थायी कर्मचारी पठाउने उनको भनाइ छ ।