विद्यालयको पानी ट्याङकीमा विष राखेको घटनाबारे तत्काल छानबिन गरी दोषीलाई कारबाही गर्न सांसदले सरकारसँग माग गरेका छन् । प्रतिनिधिसभाको बुधबारको बैठकमा विशेष समय लिएर सांसद घनश्याम खतिवडाले विद्यालयको पिउने पानीको ट्यांकीमा बिष राख्ने घटनाको तत्काल छानबीन गरि दोषीलाई हदैसम्मको कारबाही गर्न माग गरेका हुन् ।

घटनाको समयमा लेटाङ नगरपालिकाको इलाका प्रहरी कार्यालयमा एउटा गाडी पनि चल्न सक्ने अवस्थामा नभएको भन्दै उनले लेटाङ नगरपालिकाको इलाका प्रहरी कार्यालयलाई साधन स्रोत सम्पन्न बनाउन सरकारको ध्यानाकर्षण गराए । ‘पिउने पानीमा विष राख्ने अपराधीलाई हदैसम्मको कारबाहीका लागि सम्पूर्ण संयन्त्रको प्रयोग गर्नुपर्यो ।’ उनले भने ।

मंगलबार मोरङ क्षेत्र नम्बर १, लेटाङ नगरपालिकाको श्री जाँते मावि ९ का विद्यार्थीहरुमा पानी पिउने वित्तिकै पेट पोल्ने, बान्ता हुने लक्षण देखिएपछि विद्यालय प्रशासनले चेक गर्दा पिउने पानीको ट्यांकीमा बिषको बोतल नै फेला परेको थियो । बिषाधीयुक्त पानी पिउँदा २६ जना विद्यार्थी विरामी परेका छन् । १८ जना सामान्य उपचारपछि घर फर्किए पनि २ जनाको उर्लाबारी नगरपालिकाको मंगलबारे अस्पताममा र ४ जना विराटनगर स्थित नोवेल अस्पतालमा उपचार भईरहेको छ । प्रहरीले विभिन्न बिपतको समयमा पनि भाडाको सवारी साधन प्रयोग गर्ने गरेको उल्लेख गर्दै खतिवडाले प्रहरीलाई संचार र यातायातका साधन सम्पन्न गराउन माग गरे ।

त्यसैगरी सांसद प्रकाशमान सिंहले काठमाडौँ क्षेत्र नम्बर १ को वडा नम्बर १०, ११ र २९ मा धोवीखोला र बागमती नदीको बाढीले ठूलो क्षति पुर्याएको भन्दै उपयुक्त राहत र क्षतिपुर्तिको व्यवस्था गर्न सरकारको ध्यानाकर्षण गराए ।