नेपाल कम्युनिस्ट पार्टी (नेकपा) एकता सिफारिसमा रुपन्देहीमा साविक एमालेभित्रको सिफारिसप्रति जिल्ला कमिटीका उपाध्यक्ष पुरुषोत्तम घिमिरेले अध्यक्षद्वय प्रचण्ड र केपि ओली तथा महासचिव तथा सचिवालयसमक्ष ध्यानाकर्षण पत्र दर्ता गराएका छन् ।

उनले ध्यानकर्षणपत्रमा ‘मैले साविक जिल्ला कमिटीको उपाध्यक्ष भएर कार्यवाहक अध्यक्ष भई स्थानीय निर्वाचन र मेचिमहाकाली अभियान जस्ता महत्वपूर्ण अभियानहरु सफलतापूर्वक सञ्चालन गरेको छु । त्यसले परिणाम पनि दिएको छ । साविक अध्यक्ष शिव सुवेदी मेयरमा निर्वाचित भएपछि एकता प्रक्रियामा स्वाभाविक रुपमा साविक एमालेले अध्यक्ष पाउँदा म अध्यक्ष सिफारिस हुनु पर्ने हो । तर अन्यथा सिफारिस भएको सुनिएकोले त्यसप्रति गम्भीर असहमती रहेको’ उल्लेख गरेका छन् ।

घिमिरेले आफ्नो इच्छा र सहमतिविपरित अन्य व्यक्तिका पक्षमा सिफारिस जाने भनेको प्राकृतिक न्यायको सिद्धान्त समेत विपरित छ । पार्टीमा विधि र लोकतन्त्र दुवै स्थापित भएन भन्ने प्रतिक्रिया दिएका छन् ।

उनले रुपन्देहि जिल्ला को आठौं जिल्ला अधिवेशनको स्मरण गराउँदै आफु अधिवेशनमा अध्यक्षको उम्मेदवार रहेको र पार्टी उपमहासचिवद्वयबाट अहिले शिव सुवेदीलाई सहमति गरौं अर्को पटक तपाई हुनुहोला भन्नु भएरै उम्मेदवारी छाडेको पनि उल्लेख गरेका छन् । ध्यानाकर्षणमा ‘पार्टीमा सत्ता र शक्तिले मान्छे र संस्थालाई अन्धो बनाउँछ भन्छन्, हाम्रो पार्टीमा त्यस्तो नहोस भन्ने अनुरोध पनि गरेका छन् ।’

केन्द्रले बनाएको कार्यदलले एक पटक पनि आफूसँग परामर्श नगरेकोमा पनि उनले आक्रोश पोखेका छन् । प्रदेश नं ५ को सिफारिस कुनै मापदण्डमा आधारित नभएकोले विवादित बनेको छ । कार्यदलमा शंकर पोखरेल, दल बहादुर राना, मणि थापा र गणेश पुन सदस्य थिए ।

कार्यदलले पार्टी प्रदेश कार्यलय सचिव गोपाल भटराईलाई रुपन्देही जिल्ला अध्यक्ष सिफारिस गरेको कुरा यस अघिनै सार्वजनिक भएको थियो । तर केन्द्रिय सचिवालयले कार्यदलका सिफारिस बारे कुनै निर्णय गरेको छैन ।

याे पनि पढ्नुहाेस् :

नेकपामा अन्तर्कलह : उपेक्षा गरिएको नेपाल पक्षको बुझाइ

नेकपाभित्र लफडा : झलनाथ खनालपछि माधव नेपाललाई गुटको धक्का

प्रकाशित समय : ०२:३६ बजे