मुुलुकी फौजदारी अपराध संहिता परिमार्जनको माग गर्दै नेपाल चिकित्सक संघले आइतबारबाट आन्दोलन गर्ने भएको छ । आइतबार विहान १० बजे माइतीघर मण्डलामा भेला हुने र मेडिकल काउन्सिल गएर प्रमाणपत्र फिर्ता दिने संघको कार्यक्रम छ ।

संघले देशभरका चिकित्सकहरुलाई भदौ १५ सम्म आफ्नो प्रमाणपत्र बुझाउन भनेको थियो । अहिलेसम्म ३ हजार बढी चिकित्सकको प्रमाणपत्र जम्मा गरेको र मेडिकल काउन्सिलमा बुझाउन लागिएको संघका अध्यक्ष डा. मुक्तिराम श्रेष्ठले बताए ।

यही भदौ १ बाट लागु मुलुकी अपराध संहिताका केही बुँदामा असहमति राख्दै चिकित्सक संघ आन्दोलनमा उत्रिन लागेको हो । यसअघि संघले भदौ १ बाटै विरामी नजाँच्ने घोषणा गरेको थियो । तर, सरकारले मुलुकी ऐन संशोधनको आश्वासन दिएपछि आन्दोलन रोकिएको थियो ।

तर सरकारले ऐन सशोधन गर्ने प्रस्ताव नल्याएपछि सरकारलाई दबाब दिन संघ आन्दोलनमा उत्रन लागेको हो । मुलुकी फौजदारी संहिता संशोधनको माग गर्दै संघले सोमबार देशभर आकस्मिक बाहेकका सेवा बन्द गर्न आह्वान गरेको छ ।

संहितामा उपचारका क्रममा लापर्वाहीले विरामीको मृत्यु भएमा ज्यान मुद्दा चलाउने प्रावधान छ । चिकित्सक संघ उक्त व्यवस्थाको संशोधन गर्न माग गर्दै आन्दोलनमा उत्रन लागेको हो ।

प्रकाशित समय : ०१:४२ बजे