सादगी नेताको पहिचान बनाएका तत्कालीन एमाओवादीका उपाध्यक्ष पोष्टबहादुर बोगटीले यो संसारबाट बिदा लिएको चार वर्ष बितिसकेको छ । सर्वहारावर्गको मुक्तिका लागि काँधमा हलोदेखि बन्दुकसम्म राखेका बोगटीका जीवनका धेरै अनुकरणीय पाटा छन् ।

गणतन्त्रका लागि उनले गरेका त्याग, तपस्या र संघर्षको गाथा इतिहासका पानामा सुनौला अक्षरमा लेखिएका छन् । हिमालयझैं अग्लो व्यक्तित्व, विशाल र उदात्त अनि चट्टानसरह अडिग स्वभावका कारण बोगटीलाई धेरैले आदर्श नायकका रूपमा सम्झिरहेका छन् । ‘हिमाल, पहाड र तराईको भावनात्मक एकताका पक्षमा निर्भयताका साथ खडा रहेका बोगटी गणतन्त्र नेपाल रहँदासम्म जिउँदै रहनेछन्’ भनेर धेरैले टिप्पणी गर्छन् ।

सन्दर्भ : बोगटी समृति दिवस

कहिल्यै पनि विवादमा नपरेका लोकप्रिय नेता पोष्टबहादुर बोगटी सरल र मिलनसार स्वाभावका थिए । बोगटीलाई एमाओवादीको साताौं महाधिवशेनले महासचिव बनाएको थियो । विराटनगरमा राष्ट्रिय भएको पदाधिकारी चयनमा उनले उपाध्यक्षमा शतप्रतिशत मत प्राप्त गरेका थिए । नुवाकोटको तत्कालीन तुप्चे गाविस–२ का बासिन्दा बोगटी कुनै विवादमा नपरेका र निष्कलंक छवि बनाएका नेताको रुपमा चिनिन्थे ।

किशोरावस्थामा भारतीय सेनामा जागिर खाने सपना साँचेका बोगटीले भारतमा भौतारिँदा धेरै दुःख झेल्नुप¥यो । पछि उनले स्वदेश फर्केर माछा फार्म र घरेलु उद्योगमा नोकरी गर्न थाले । कक्षा ८ सम्म औपचारिक शिक्षा लिएका उनले भाल्चेमा रहेको सरकारी भेडा फर्ममा केही वर्ष नोकरी गरे ।

मंसिरमा काटेको धान खलियाबाटै साहुलाई तिर्दा ठिक्क हुने उनको जग्गा जमिन थियो । धादिङ, रसुवा र नुवाकोटको माओवादी इञ्चार्ज हुँदासम्म उनले पुरानो ऋण चुक्ता गर्न सकेका थिएनन् । आफूले पैतृक सम्पत्तिको रुपमा पाएको एक टुक्रो जमिन त्रिशूली जलविद्युत् आयोजनाले अधिग्रहणमा परेपछि बोगटीको परिवारले झनै दुःख पायो । अधिग्रहणबाट बचेको केही सम्पत्ति पनि विद्यालयलाई दान दिएपछि उनी भूमिहीन भए ।

बाहुनले हलो जोत्नुहुँदैन भन्ने समयमा जन्मेका बोगटीले नुवाकोटमा बाहुनले हलो जोत्ने अभियानको नेतृत्व गरेका थिए । साथै, उनले पञ्चायतकालमा गाउँमा विभिन्न क्लब र पुस्तकालय निर्माण गराएका थिए ।

बोगटीले आफ्नो घर र जग्गाजमिन चण्डेश्वरी माध्यमिक विद्यालयलाई दान दिएका थिए । सबै जग्गाजमिन विद्यालयलाई दान दिएपछि परिवार माओवादी युद्धमा होमियो । बोगटी पञ्चायतकालदेखि नै वाम राजनीतिमा लागेका थिए । बोगटीका एक छोरा र दुई छोरीमध्ये छोरा रवि बोगटी विद्यार्थी राजनीतिमा सक्रिय रहेका बेला मारिए । २०५८ सालमा धादिङको सत्यदेवीमा तत्कालीन शाही नेपाली सेनाले उनको हत्या गरेको थियो ।

पार्टीमा पुष्पकमल दाहाल ‘प्रचण्ड’ निकट मानिने बोगटी पहिलो संविधानसभा निर्वाचनमा नुवाकोट क्षेत्र नम्बर ३ बाट अत्यधिक मतले निर्वाचित भए । त्यसपछि उनी सूचना तथा सञ्चार, संस्कृति पर्यटन एव नागरिक उड्डयनमन्त्री र ऊर्जामन्त्रीसमेत भए । बोगटी पहिलो संविधानसभामा सदस्य हुँदा एमाओवादीको तर्फबाट संविधानसभामा प्रमुख सचेतक भए ।

पार्टीमा सबैको विश्वासपात्र भएकैले बोगटीले पार्टीभित्रको सम्पत्ति छानबिन आयोग एवं लडाकुको भ्रष्टाचारसम्बन्धी छानबिन समितिको नेतृत्व गर्ने जिम्मा पाएका थिए । तर, दुःखको कुरा सन्तुलित नेताको पहिचान बनाएका बोगटीले तयार पारेको प्रतिवेदन अहिलेसम्म कार्यान्वयन गरिएको छैन ।

प्रकाशित समय : ०१:०१ बजे