नेपा कम्युनिस्ट पार्टी (नेकपा) अध्यक्ष पुष्पकमल दाहाल ‘प्रचण्ड’ बिहीबार दक्षिणी छिमेकी मुलुक भारत भ्रमणमा जाँदै छन् । प्रचण्ड दिउँसो साढे ३ बजे एयर इन्डियाको हवाइजहाजबाट नयाँ दिल्ली जान लागेका हुन् । पत्नी सीता, छोरी गंगा, स्वकीय सचिव जोगबहादुर महरा र प्रेस सहयोगी सूर्यकिरण शर्मासहति दाहाल दिल्ली जाने उनको सचिवालयले जनाएको छ ।

दिल्ली पुगेपछि बिहीबार नै उनी नेपाली राजदूतावासको सामान्य भेटघाट कार्यक्रममा सहभागी हुनेछन् । शुक्रबार उनले आईसीडब्लूएको कार्यक्रममा सम्बोधन गर्नेछन् । त्यसपछि राजनीतिक भेटघाट सुरु गर्ने दाहालले भारतीय विदेशमन्त्री शुष्मा स्वराजसँग भेटवार्ता गरेपछि अरु नेताहरूसँग भेटघाट गर्नेछन् ।

उनले भारतीय प्रधानमन्त्री र अन्य राजनीतिक दलका नेताहरूसँग पनि भेटघाट गर्ने कार्यक्रम छ । नेपालको राष्ट्रिय हित, विकासप्रति जनताको आकांक्षा सम्बोधन गर्ने र विगतमा नेपाल र भारतबीच भएका सहमति–सम्झौता कार्यान्वयनमा केन्द्रित रहेर भारतीय प्रधानमन्त्रीलगायत नेताहरूसँग छलफल गर्ने बताईएको छ ।

भारत बसाईका क्रममा दाहालले त्यहाँका बुद्धिजीवी र पत्रकारसँग पनि भेटघाट गर्नेछन् । भारत सरकारको निमन्त्रणामा दिल्ली जान लागेका उनी ३ दिनपछि स्वदेश फर्कने तालिका छ । स्वदेश फर्केपछि दाहाल भदौ ३० मा अर्काे छिमेकी चीनको भ्रमणमा जाने कार्यतालिका छ ।