नेप्से १५ अंक बढ्यो, दुई दिनमै ३४ अंकको वृद्धि
वि.सं.२०७५ पुस २ सोमवार २२:२२
shares

सेयर बजार परिसूचक नेप्से दुई दिनमै ३४ अंकले बढेको छ । आइतबार १८.८९ अंकले बढेको बजार सोमबार १५.१७ अंकले उकालो लाग्दै ११८२.७८ अंकमा पुगेको हो ।
कारोबारको मध्यसमयसम्म करिब स्थिर देखिएको सेयर बजार उत्तरार्धमा लगातार बढेको हो । व्यापारबाहेक नेप्सेमा सूचीकृत सबै समूह उकालो लागेका छन् । व्यापार समूह भने १.२६ प्रतिशतले घटेको छ । आज पनि निर्जीवन बिमा कम्पनी समूह सबैभन्दा धेरै ४.२ प्रतिशतले बढेको छ । जीवन बिमा ३.७१ र लघुवित्त समूहमा ३.०८ प्रतिशतको वृद्धि आएको छ । बैंक, होटल, विकास बैंक, जलविद्युत, वित्त र अन्य समूहमा सकारात्मक बनेपछि समग्र बजार परिसूचक उकालो लाग्यो ।
नेप्से बढे पनि कारोबार रकम भने केही घटेको छ । सोमबार १५९ कम्पनीको ४२ करोड ३ लाख रुपैयाँबराबरको १२ लाख ६० हजार ५१८ कित्ता सेयर किनबेच भयो । आइतबार ४७ करोड ४२ लाखको सेयर कारोबार भएको थियो ।

























