गरिमा विकास बैंकले कर्जा प्रवाह रणनीतिलाई थप प्रभावकारी बनाउने उद्देश्यसहित दुई कर्जा सुविधा सार्वजनिक गरेको छ । बैंकले ‘गरिमा इजी एसएमई लोन’ र ‘गरिमा इजी होम लोन’ योजना सार्वजनिक गरेको हो ।

दुबै कर्जा सुविधा ८.८८ प्रतिशत ब्याजदरमा उपलब्ध हुने बैँकले जनाएको छ । ‘गरिमा इजी एसएमई लोन’ धितो मूल्यांकनको शतप्रतिशत र ‘गरिमा इजी होम लोन’ कर्जाको प्रकृति हेरी लागतको शतप्रतिशतसम्म प्रदान गर्न सकिने बैँकका प्रमुख कार्यकारी अधिकृत (सीईओ) गोविन्दप्रसाद ढकालले जानकारी दिए ।

ऋणीले अन्य बैंक तथा वित्तीय संस्थाबाट निःशुल्क कर्जा सार्न पनि सक्नेछन् । बैँकले दुबै कर्जाको सेवा शुल्कमा ५० प्रतिशतसम्म छुट सुविधा दिएको छ । ‘कोभिड १९ का कारण उत्पन्न विषम परिस्थितिका कारण बढ्दो बेरोजगारी तथा उद्यमशीलतामा ह्रास आएको अवस्थालाई मनन गर्दै सरल र सहज तवरबाट कम ब्याजदरमा कर्जा सुविधा दिन लागेका हौँ,’ सीईओ ढकालले भने । गरिमा विकास बैंकले १०६ शाखा कार्यालय र ५१ एटीएमबाट ग्राहकलाई सरल, सुरक्षित एवं गुणस्तरीय बैँकिङ सेवा प्रदान गर्दै आएको छ ।

प्रकाशित समय : १४:०७ बजे