मोरङको सुनवर्षी नगरपालिकाका जनप्रतिनिधि तथा कर्मचारीहरु बजेटको दुरुपयोग गर्दै विदेश भ्रमणमा गएको पाइएको छ । सो नगरपालिकाका प्रमुख कालिप्रसाद दास र उपप्रमुख मञ्जु राई लगायतको टोली बजेटको दुरुपयोग गर्दै छिमेकी मुलुक भारतका पर्यटकीय स्थलहरुको भ्रमण गर्न गएको पाइएको हो ।

नगरपालिकाका प्रमुख दासले नेतृत्व गरेको भ्रमण टोली भारतको सिक्किम, दार्जीलिङ, ग्यान्टोक लगायतका पर्यटकीय स्थलहरुमा पुगेको हो । टोलीमा उपप्रमुख मञ्जु राई, प्रशासकीय अधिकृत राजकुमार केसी, ८ जना वडा अध्यक्ष, नगरपालिकाका शाखा प्रमुखहरु र केही कृषक समेत गरेर २२ जना गाएका थिए ।

गत बुधबार कृषि अध्ययन अवलोकन भ्रमणका लागि सुनसरी, मोरङ, झापा र इलामका जाने कार्यतालिका बनाएर भ्रमण टोली निस्किएको थियो । उक्त टोलीका सदस्यहरुले सिक्किमको ग्यान्टोक पुगेर फेसबुकमा फोटो सार्बजनिक गरेपछि कृषि अवोलकन भ्रमणको नाममा विदेश पुगेको रहस्य खुलेको हो । टोलीको आलोचना भएपछि फेसबुकमा राखेको फोटो कर्मचारीले हटाएका छन् ।

सो नगरपालिकाले चालु आर्थिक वर्षका लागि कृषि क्षेत्रको विकासका लागि ७ लाख रुपैयाँ बजेट विनियोजन गरेको थियो । सो रकम मध्ये ५ लाख बजेट लिएर टोली अवलोकन भ्रमणका निस्किएको बताइएको छ । सुनवर्सी नगरपालिकाका कार्यवाहक अध्यक्ष प्रताप तामाङले पाँच लाख बजेट विनियोजन भएको बताए । तर,सो बजेटबाट टोलि भारत पुगेको भन्ने बिषयमा आफूलाई जानकारी नभएको उनको भनाइ छ । अवलोकन भ्रमणमा नगएका उनलाई कार्यवाहक अध्यक्षको जिम्मेवारी दिइएको छ ।

‘मेयरसापहरुको टोलि झापा, मोरङ, सुनसरी र इलाममा भएका कृषि क्षेत्रको अध्ययन अवलोकनका लागि भनेर जानु भएको हो,’ कार्यवाहक अध्यक्ष तामाङले भने ‘नगरपालिकाबाट मलाई पाँच दिनको कार्यवाहक दिइएको छ ।’

नगरपालिकाका सबै फाटवाला प्रमुखहरु भ्रमणमा गएपछि नायव सुब्बा नगेन्द्र पराजुलीलाई निमित्त प्रशासकीय अधिकृतको जिम्मेवारी दिइएको थियो । यता भ्रमणबाट फर्किएका प्रमुख कालिप्रसाद दासले भने आफ्नो टोलि पशुपतिनगरसम्म मात्र पुगेको दाबी गरेका छन् । उनले भने ‘हामी पशुपतीनगरसम्म पुगेका हौं,’ सिक्किम गएका छैनौँ ।’ भ्रमण टोलीको एक सदस्ययका अनुसार बिहीबार सिक्किम गएको टोली शुक्रबार साँझ पशुपतीनगर आएर बसेको थियो ।