श्रीलंकामा गहिरियो राजनीतिक संकट
वि.सं.२०७५ कात्तिक २८ बुधवार १९:४०
shares

राष्ट्रपति मैत्रीपाला सिरिसेनाले रनिल विक्रमासिंघेलाई हटाएर पूर्व राष्ट्रपति महिन्दा राजपाक्षेलाई प्रधानमन्त्री चयन गरेपछि श्रीलंकामा गहिरिएको राजनीतिक संकट झन् कठिन मोडमा पुगेको छ । राजनीतिक दाउपेचकाबीच राष्ट्रपति सिरिसेनाले विक्रमासिंघेलाई हटाएर राजपाक्षेलाई प्रधानमन्त्री बनाएपछि सतहमै देखिएको श्रीलंकाको राजनीतिक संघर्ष थप कठिन बन्न पुगेको छ ।
राष्ट्रपतिद्वारा प्रधानमन्त्री चयन गरिएका राजपाक्षेले संसदको विश्वास प्राप्त गर्न सकेनन् । बुधबार श्रीलंकाको संसदमा राजपाक्षेविरुद्ध अविस्वासको प्रस्ताव पारित भएको छ । विक्रमासिंघेलाई राष्ट्रपतिले प्रधानमन्त्रीबाट हटाएका छन् भने उनले प्रधानमन्त्री बनाएका राजपाक्षेलाई संसदले अविस्वास गरेपछि राजनीतिक निकास के हुने ? भन्ने चासो श्रीलंकाली राजनीतिमा बढेको छ ।
त्यसोतः राष्ट्रपति सिरिसेनाले सम्भवतः आफ्नो कदम (राजपाक्षेलाई प्रधानमन्त्री बनाउने) संसदले अस्वीकार गर्न सक्ने विश्लेषणसहित संसद भंग गरिदिए । राष्ट्रपतिको यो कदमले राजपाक्षेविरुद्ध संसदबाट अविस्वासको प्रस्ताव पारित हुने सम्भावना हुँदैन थियो । तर श्रीलंकाको सर्वाेच्च अदालतले संसद भंग गर्ने राष्ट्रपतिको निर्णय उल्टाइदिएपछि राजपाक्षेविरुद्ध संसदले अविस्वासको प्रस्ताव पारित गर्यो । २२५ सदस्सीय संसदमा राजपाक्षेविरुद्ध ल्याइएको अविस्वासको प्रस्ताव बुधबार बहुमतले पारित भयो ।
यसपछि पनि राष्ट्रपति सिरिसेनासँग अर्काे प्रधानमन्त्री चुन्ने अधिकार छ । तर, उनले प्रयोग गरेको उक्त अधिकार संसदलाई पनि मान्य हुनुपर्ने स्पष्ट संकेत राजपाक्षेविरुद्ध पारित अविस्वासको प्रस्तावले दिएको छ । कतिपयले यसलाई श्रीलंकाली राजनीतिमा ‘अभूतपूर्व राजनीतिक संकट’को पनि सँज्ञा दिएका छन् । तर, फेरी विक्रमासिंघेलाई नै प्रधानमन्त्रीमा दोहोर्याउन सक्ने अधिकार सिरिसेनालाई त छ तर, उनका लागि यो वाध्यात्मक कदम भने होइन ।

























