ताप्लेजुङ । भूमि प्रशासन कार्यालय ताप्लेजुङले गत आर्थिक वर्षको तुलनामा चालु आवमा दोब्बर राजश्व संकलन गरेको छ । कार्यालयले गत आव २०८२÷०८३ को तुलना यस आर्थिक वर्षको तीन महिनामा दोब्बर बढी राजश्व संकलन गरेको हो ।

भूमि प्रशासन कार्यालय ताप्लेजुङका सूचना अधिकारी निर्मल शेर्पाका अनुसार कार्यालयले चालु आवको पछिल्लो तीन महिनामा एक करोड ११ लाख ३७ हजार ४३४ रुपियाँ राजश्व संलन गरेको छ । कार्यालयले तत्कालीन मालपोत कार्यालय हुँदा गत आर्थिक वर्षको यही अवधिमा ५५ लाख ५४ हजार ३१२ रुपियाँमात्र राजश्व सङ्कलन गरेको थियो ।

चालु आवमा गत आवको तुलनामा ५५ लाख ८३ हजार १२२ रुपियाँ बढी राजश्व संकलन गर्न सफल भएको छ । जलविद्युत आयोजनाहरूको दृष्टि बन्धक, लिखत पारित वृद्धि भएकाले राजश्व समेत बढी संकलन भएको सूचना अधिकारी शेर्पाको भनाइ छ ।

चालु आर्थिक वर्षको साउनमा २३ लाख चार हजार ३३२ रुपियाँ, भदौमा २८ लाख ९४ हजार २४७ र असोजमा ५९ लाख ३८ हजार ८५५ रुपियाँ राजश्व संकलन भएको कार्यालयको तथ्यांकमा उल्लेख छ । तथ्याङ्कका अनुसार चालु आवको तीन महिनामा रजिष्ट्रेशन दस्तुरमार्फत ७० लाख ४२ हजार ६४ रुपियाँ, न्यायिक सेवामार्फत २ लाख १६ हजार ९५४, मोठ–रोक्काबाट ३६ हजार ६ सय र प्रतिलिपि प्रदानबाट १८ हजार ४ सय रुपियाँ राजश्व सङ्कलन भएको छ ।

कार्यालयको पछिल्लो तीन आर्थिक वर्षको तथ्यांक अनुसार हरेक वर्ष राजश्व संलन वृद्धि भइरहेको छ । आर्थिक वर्षमा ०८०र०८१ मा दुई करोड ७९ लाख आठ हजार ३७१ रुपियाँ, ०८१ र ०८२ मा तीन करोड ७२ लाख ३९ हजार ४३७ रुपियाँ र गत आर्थिक वर्ष ०८२र०८३ मा चार करोड १९ लाख ६० हजार ८२५ रुपियाँ राजश्व संकलन भएको कार्यालयले जनाएको छ ।

चालु आवको तीन महिनामै एक करोड बढी राजश्व संकलन भएकाले यस आर्थिक वर्षमा गत आवको तुलनामा बढी राजश्व उठ्ने अनुमान कार्यालयले रहेको छ ।