काठमाडौं। राष्ट्रिय स्वतन्त्र पार्टी (रास्वपा) संसदीय दलका सचेतक प्रकाशचन्द्र परियारले समाजलाई अति दलीयकरणबाट मुक्त गर्न आग्रह गर्दै यस कार्यमा सामाजिक संघसंस्थाको भूमिका अहम हुने बताएका छन्।

आज सुनसरीमा तरहरा जेसीस सप्ताहको उद्घाटन गर्दै उनले सबैतिर राजनीतिकरण एवं दलीयकरणको दबदबाले अपेक्षति सामाजिक विकास हुन नसकेको औंल्याए।

अहिलेको समाज विस्तारै दलीयकरणतर्फ धकेलिइरहेको बताउँदै उनले मुलुकको युवा बर्गलाई सामाजिक विकास, उद्यमशीलता र राष्ट्रको हर क्षेत्रको नेतृत्वदायी भूमिकामा लाग्न प्रेरित गर्नुपर्नेमा जोड दिएका हुन्।

सचेतक परियारले भने, “समाज अति दलीयकरणको मारमा परेको छ, कम्तिमा पनि सामाजिक पछ्यौटेपनका विरुद्धमा लागिरहेका अगुवा संघसंस्थाले आफूलाई यस्तो छाँयाबाट परै राख्न सकेमा समाजको गतिशीलता अझ बढ्दै जान्छ। मुलुकको बृहत्तर हितका लागि यो अब आवश्यक भइसकेको छ।” सचेतक परियारले मुलुकको युवा बर्गलाई आफ्ना योग्यता र क्षमताअनुसार उद्यमशीलता र सिर्जनशीलताको अभियानमा लाग्न पनि आग्रह गरे।

जेसिज जस्ता संस्थाले नेपालको सामाजिक जागरण एवं युवा परिचालनका क्षेत्रमा पुर्‍याउँदै आएको योगदानको प्रशंसा गर्दै आफू पनि जेसीज अभियानको एउटा अङ्ग हुन पाएकामा गौरव महसुस गरेको धारणा उनले राखे।

त्यस अवसरमा तरहरा जेसीजका पूर्व अध्यक्ष, विभिन्न संघसंस्थाका प्रतिनिधि, जेसीजका सदस्य एवं स्थानीय समाजसेवीले जेसिज जागरण र सामाजिक अभियानका बारेमा चर्चा गरेका थिए। सो कार्यक्रममा सचेतक परियारले त्यहाँ आयोजित प्रतियोगिताका विजयी सुरज तामाङ र प्रतिमा चौधरीलाई पुरस्कार वितरण गरेका थिए।